Godari: ఓటీటీలో ‘గోదారి’ డాక్యుమెంటరీ.. ‘ఆహా’ అంటున్న ప్రేక్షకులు

ఇంటర్నెట్‌ డెస్క్‌: పలు హిట్‌ సినిమాలు, ఆసక్తికర వెబ్‌ సిరీస్‌లను అందిస్తూ ప్రేక్షకులకు వినోదం పంచుకున్న ఓటీటీ ‘ఆహా’ (Aha).. శ్రీరామ నవమి సందర్భంగా మరో కానుక అందించింది. అదే ‘ఆహా గోదారి’ (Aha Godari) డాక్యుమెంటరీ. స్వాతి ముళ్ళపూడి నిర్మించిన ఆ ప్రత్యేక డాక్యుమెంటరీ మార్చి 30న స్ట్రీమింగ్‌కి అందుబాటులోకి వచ్చింది. గోదావరి నదీ అందాలు, విశేషాలు అందరికీ తెలియాలని, ఇలాంటి డాక్యుమెంటరీల వల్ల మన సంస్కృతి, సంప్రదాయాలతో పాటు అత్యద్భుతమైన ప్రాచీన కట్టడాల గురించి ప్రేక్షకులకు వివరించే అవకాశం ఉంటుందని ‘ఆహా’ యాజమాన్యం తెలిపింది. స్వాతి మాట్లాడుతూ.. ‘‘ఆహా’ ఓటీటీ ద్వారా ఈ ఆహా గోదారి డాక్యుమెంటరీని ప్రేక్షకులకు చూపించడం ఎంతో ఆనందంగా ఉంది. ఇంతకుముందెన్నడూ చూడని గోదారి అందాలను చిత్రీకరించాం. గోదావరి నదీ విశిష్టత, దాని పరివాహక ప్రాంతాల సంస్కృతి, సంప్రదాయాలను కళ్లకు కట్టినట్టు చూపించాం’’ అని తెలిపారు. ఈ డాక్యుమెంటరీకి స్వాతి దివాకర్‌ దర్శకత్వం వహించారు. ఇప్పటికే వీక్షించిన పలువురు ప్రేక్షకులు బాగుందంటూ సోషల్‌ మీడియాలో పోస్ట్‌లు పెడుతున్నారు.