Nani: నాని చిత్రం కోసం హాలీవుడ్‌ నటుడు?

తెలుగు సినిమాలు అంతర్జాతీయ మార్కెట్‌పైనా గురిపెడుతున్నాయి. మొన్నటివరకూ టాలీవుడ్‌లో పాన్‌ ఇండియా అనే మాటే ఎక్కువగా వినిపించేది. ఈమధ్య మరో అడుగు ముందుకు పడింది. పాన్‌ వరల్డ్‌ అంటున్నారు చాలామంది దర్శకనిర్మాతలు. ఎక్కువమంది ప్రేక్షకులకు చేరువ కావాలనే లక్ష్యంతో... అంతర్జాతీయ స్థాయిలో తమ సినిమాల్ని తెరకెక్కిస్తున్నారు. అందుకోసం ప్రత్యేక హంగుల్నీ జోడిస్తున్నారు. నాని కథానాయకుడిగా నటిస్తున్న ‘ది ప్యారడైజ్‌’ కూడా అంతర్జాతీయ స్థాయిలోనే రూపొందుతోంది.   భారతీయ భాషలతోపాటు, ఇంగ్లిష్,  స్పానిష్‌లోనూ దీన్ని విడుదల చేయనున్నారు. ఈ సినిమాకి అంతర్జాతీయ ఆకర్షణని తీసుకొచ్చేలా ఓ కీలకమైన పాత్రకోసం ఓ హాలీవుడ్‌ నటుడిని ఎంపిక చేసుకోవాలని చిత్రబృందం ప్రయత్నాలు చేస్తున్నట్టు సమాచారం. అందులో భాగంగానే రయన్‌ రేనల్డ్స్‌ను సంప్రదించినట్టు సమాచారం. ‘డెడ్‌పూల్‌’ చిత్రంతో ఆకట్టుకున్న నటుడు ఈయన. శ్రీకాంత్‌ ఓదెల దర్శకత్వంలో... సుధాకర్‌ చెరుకూరి నిర్మాతగా రూపొందుతున్న చిత్రమిది.