Sivakarthikeyan: సినిమా ఫ్లాప్.. పూర్తి బాధ్యత నాదే: శివ కార్తికేయన్‌

చెన్నై: శివ కార్తికేయన్‌ (Siva Karthikeyan) ప్రధాన పాత్రలో నటించిన సరికొత్త చిత్రం ‘మహావీరన్‌’ (Mahaveeran). అదితి శంకర్‌ కథానాయిక. త్వరలో ఈసినిమా ప్రేక్షకుల ముందుకు రానున్న నేపథ్యంలో శివ కార్తికేయన్‌ తాజాగా విలేకర్ల సమావేశంలో పాల్గొన్నారు. ఈ కథ తనకు ఎంతో బాగా నచ్చిందని అన్నారు. ప్రేక్షకులు తప్పకుండా ఈ చిత్రానికి కనెక్ట్‌ అవుతారని.. సినీ ప్రియులను అలరించే సన్నివేశాలు ఇందులో మెండుగా ఉన్నాయని తెలిపారు. అనంతరం ఆయన.. ఇటీవల విడుదలైన తన సినిమాల రిజల్ట్‌పై మాట్లాడారు. ‘‘నేను నటించిన ఏదైనా సినిమా బాక్సాఫీస్‌ వద్ద పరాజయం అందుకుంటే దాని పూర్తి బాధ్యత నేనే వహిస్తా. అలాగే, నేను నటించిన చిత్రాలు మంచి విజయాన్ని అందుకుంటే ఆ క్రెడిట్‌ టీమ్‌ అందరికీ సొంతం’’ అని ఆయన తెలిపారు.

• ఇదీ చదవండి: ఆన్‌లైన్‌ నెగెటివిటీపై తమన్‌ ఏమన్నారంటే?

‘మహావీరన్‌’ ఫాంటసీ కథతో సిద్ధమైంది. మడోన్‌ అశ్విన్‌ దర్శకుడు. జులై 14న ఇది ప్రేక్షకుల ముందుకు రానుంది. ఇదే చిత్రాన్ని తెలుగులో ‘మహావీరుడు’ పేరుతో విడుదల చేయనున్నారు. ఇక, శివకార్తికేయన్‌కు తెలుగులో మంచి మార్కెట్‌ ఉంది. ‘రెమో’తో ఆయన టాలీవుడ్‌లో తనకంటూ ప్రత్యేకమైన క్రేజ్‌ సొంతం చేసుకున్నారు. ఆయన నటించిన ‘డాక్టర్‌’, ‘డాన్‌’ చిత్రాలు ఇక్కడి వారినీ అలరించాయి. ఇటీవల ఆయన ‘ప్రిన్స్‌’ అనే డైరెక్ట్‌ తెలుగు సినిమాలో యాక్ట్‌ చేయగా.. అది మిశ్రమ స్పందనలకు పరిమితమైంది. ఆ సినిమా తర్వాత ఆయన నుంచి వస్తోన్న చిత్రమిదే.