Janhvi Kapoor: గాయాలు తట్టుకోలేక.. తప్పుకొందామనుకున్నా!

కథల ఎంపికలో తనదైన ప్రత్యేకతను చూపిస్తూ ప్రేక్షకులను మెప్పిస్తోంది బాలీవుడ్‌ నాయిక జాన్వీ కపూర్‌. ప్రస్తుతం వరుస సినిమాలతో తీరిక లేకుండా గడుపుతున్న ఈ భామ.. ఇటీవలే ‘మిస్టర్‌ అండ్‌ మిసెస్‌ మహి’తో ప్రేక్షకుల ముందుకు వచ్చింది. ఈ సందర్భంగా తాజాగా జరిగిన ఓ ఇంటర్వ్యూలో పాల్గొన్న జాన్వీ.. ఈ చిత్రంలోని తన అనుభవాలను ఇలా పంచుకుంది.

•  ‘‘మిస్టర్‌ అండ్‌ మిసెస్‌ మహి’ మనసును ఆకట్టుకునే భావోద్వేగాలు, మంచి విలువలతో నిర్మించిన చిత్రం. కుటుంబ సమేతంగా చూడొచ్చు. యువతకు స్ఫూర్తినిచ్చే విధంగానూ ఉంటుంది. ఒక వ్యక్తి తన కలల్ని నిజం చేసుకోవడానికి కుటుంబ తోడ్పాటు ఎంత అవసరమో ఇందులో చూపించాం’’.
• ‘‘మొదట్నుంచీ భిన్నమైన కథలు, పాత్రలను ఎంచుకుంటూనే ముందుకు సాగుతున్నాను. కానీ.. ఇందులో మీరు మరో కొత్త జాన్వీ కపూర్‌ను చూస్తారు. 
• ఈ పాత్ర కోసం మానసికంగా, శారీరకంగా ఎన్నో కసరత్తులు చేశాను. ఇప్పటివరకు నేను నటించిన పాత్రలన్నింటి కన్నా.. ఇందులో మహిమ పాత్రలో రెండింతల ఉత్సాహాన్ని, అనుభూతిని పొందాను. ఇంతకముందెప్పుడూ ఏ పాత్రలోనూ ఇలా ప్రత్యేకంగా శిక్షణ తీసుకుంటూ నటించలేదు’’.
•  ‘‘ఎంచుకునే ప్రతి పాత్రలోనూ కొత్తదనం ఉండేలా చూసుకుంటాను. ఇప్పటి వరకు రెండు సినిమాల్లో పెళ్లయిన అమ్మాయిగా నటించాను. ఇలాంటి పాత్రల్లో నటించడం వల్ల వివాహ పద్ధతుల గురించి సులభంగా తెలుసుకోగలుగుతున్నాను. ఈ పాత్రల నేపథ్యం ఏంటి? వైవాహిక అనుబంధాలు ఎలా ఉంటాయి? ఇలాంటివన్నీ నేను పరిగణించవలసిన ముఖ్యమైన అంశాలు’’.
• ‘‘ఈ చిత్రం కోసం క్రికెట్‌ శిక్షణ తీసుకున్నా. నా కోచ్‌లు నన్ను క్రికెట్‌ అభిమానిగా మార్చేశారు. ఇందులో క్రికెట్‌కు సంబంధించిన సన్నివేశాలను చిత్రీకరించే సమయంలో ఎన్నోసార్లు గాయాలయ్యాయి. తట్టుకోలేక కొన్నిసార్లు ఈ సినిమా నుంచి తప్పుకోవాలనుకున్నా. కానీ తర్వాత మనసు మార్చుకొని, ఎన్నో సవాళ్లను అధిగమించి ప్రతి సీన్‌ సహజంగా రావడానికి ఎంతో కష్టపడ్డాను’’.
• ‘‘రాజ్‌కుమార్‌ రావ్‌తో కలిసి నటించడం చాలా సంతోషంగా ఉంది. సినిమా గురించి, ఆ ప్రాజెక్టులో భాగమైన నటులు, సాంకేతిక నిపుణులు, సినిమా నిర్మాణం.. ఇలా ప్రతి అంశం పట్ల చాలా మక్కువ కలిగి ఉంటారు. ఈ సినిమా చిత్రీకరణ సమయంలో మానసికంగా ధైర్యాన్ని చెప్తూ సహకరించారు’’.