Jawan: 50 రోజులు పూర్తి చేసుకున్న ‘జవాన్‌’.. వసూళ్లు ఎంతంటే?

ఇంటర్నెట్‌ డెస్క్‌:  ‘పఠాన్‌’ (Pathaan)తో పవర్‌ఫుల్‌ కమ్‌బ్యాక్‌ ఇచ్చారు బాలీవుడ్‌ స్టార్‌ హీరో షారుక్‌ ఖాన్‌ (Shah Rukh Khan). ఆ సినిమా బ్లాక్‌ బస్టర్‌గా నిలిచి రూ.1000 కోట్లకు పైగా వసూళ్లు చేసి రికార్డు సృష్టించింది. దాని తర్వాత ‘జవాన్‌’తో ప్రేక్షకుల ముందుకు వచ్చారు. ఈ చిత్రం విమర్శకుల ప్రశంసలు అందుకుంటూ రికార్డులను బ్రేక్‌ చేస్తోంది. తాజాగా దీనిపై దర్శకుడు అట్లీ పోస్ట్‌ చేశారు.

భారీ అంచనాల మధ్య సెప్టెంబర్‌ 7న ‘జవాన్‌’ ప్రేక్షకుల ముందుకు వచ్చింది. అట్లీ-షారుక్‌ల కాంబినేషన్‌కు ప్రేక్షకులు ఫిదా అవ్వడంతో సినిమా సూపర్‌ హిట్‌ను సొంతం చేసుకుంది. ఈ చిత్రం విడుదలై 50రోజులు పూర్తి కావడంతో దర్శకుడు అట్లీ స్పెషల్‌ పోస్ట్‌ చేశారు. ‘‘జవాన్’ (Jawan)తో మీ ముందుకు వచ్చి 50 రోజులవుతోంది. ఇప్పటికీ ఈ చిత్రం కొన్ని లక్షల మంది హృదయాలను గెలుచుకుంటోంది. ప్రపంచమంతా దీని హవా కనిపిస్తూనే ఉంది’ అంటూ ఓ పోస్టర్‌ను విడుదల చేశారు. తొలిరోజే రూ.100కోట్లు వసూళ్లు చేసిన ఈ చిత్రం ఇప్పటి వరకు రూ.1,145 కోట్ల కలెక్షన్స్‌ రాబట్టింది. 50వ రోజు కూడా సుమారు రూ.11లక్షలు వసూళ్లు చేసింది. దీంతో ఆయన అభిమానులు సంబరపడుతున్నారు. ఇక ఈ సినిమాలో నయనతార హీరోయిన్‌గా నటించగా.. విలన్‌గా విజయ్‌ సేతుపతి ఆకట్టుకున్నారు. ఇతర పాత్రల్లో ప్రియమణి, సాన్యా మల్హోత్ర, దీపికా పదుకొణె తదితరులు అలరించారు.

‘ఐరనే వంచాలా ఏంటి’ ఈ మీమ్స్‌ చూస్తే నవ్వకుండా ఉండలేరు!

ప్రస్తుతం రాజ్‌కుమార్‌ హిరాణీ దర్శకత్వంలో షారుక్‌ ‘డంకీ’ (Dunki) చిత్రంలో నటిస్తున్నారు. ఈ సినిమా చిత్రీకరణ చివరి దశలో ఉంది. డిసెంబరు 21న దీన్ని విడుదల చేయనున్నారు. దీని టీజర్‌ను షారుక్‌ పుట్టినరోజు సందర్భంగా నవంబర్‌2న రిలీజ్ చేయనున్నారు. ఈ సినిమాలో తాప్సీ, దియా మీర్జా, బొమన్‌ ఇరానీ తదితరులు కీలక పాత్రలు పోషిస్తున్నారు. గౌరీఖాన్‌, రాజ్‌కుమార్‌ హిరాణీ, జ్యోతి దేశ్ పాండేలు నిర్మిస్తున్నారు.