Rajinikanth: నటుడి మనవరాలి వివాహ వేడుకలో రజనీకాంత్‌.. ఫొటోలు వైరల్‌

ఇంటర్నెట్‌ డెస్క్‌: కోలీవుడ్‌ సీనియర్‌ నటుడు విజయ్‌ కుమార్‌ (Vijay Kumar) మనవరాలు దియా వివాహం సోమవారం అట్టహాసంగా జరిగింది. చెన్నైలోని ఓ హోటల్‌ ఈ వేడుకకు వేదికైంది. రజనీకాంత్‌ (Rajinikanth) హాజరై, వధూవరులను ఆశీర్వదించారు. ఆయన హోటల్‌లో అడుగుపెట్టే దృశ్యాలు, విజయ్‌కుమార్‌ ఫ్యామిలీతో కలిసి దిగిన ఫొటోలు నెట్టింట వైరల్‌ అవుతున్నాయి. విజయ్‌కుమార్‌కు ఐదుగురు కుమార్తెలు, ఒక కుమారుడు. వారిలో వైద్యురాలైన అనిత తనయ ఈ దియా. వనిత, ప్రీత, శ్రీదేవి, అరుణ్‌, విజయ్‌ నటులుగా స్థిరపడ్డారు. కవిత పలు చిత్రాల్లో నటించారు.

రజనీకాంత్‌- విజయ్‌కుమార్‌ ఎప్పటినుంచో స్నేహితులు. రజనీకాంత్‌ హీరోగా తెరకెక్కిన ‘బాషా’, ‘చంద్రముఖి’, ‘బాబా’ తదితర చిత్రాల్లో విజయ్‌ కీలకపాత్రలు పోషించారు. ఈ డబ్బింగ్‌ సినిమాలకంటే ముందు ‘గీతాంజలి’, ‘లారీ డ్రైవర్‌’, ‘కిల్లర్‌’ వంటి స్ట్రైట్‌ తెలుగు ఫిల్మ్స్‌లో నటించి, ఇక్కడి ప్రేక్షకులను అలరించారు. రజనీకాంత్‌ ప్రస్తుతం ‘వేట్టయాన్‌’ (Vettaiyan)తో బిజీగా ఉన్నారు. ‘జై భీమ్‌’ దర్శకుడు టి.జె. జ్ఞానవేల్‌ తెరకెక్కిస్తున్న ఈ చిత్రంలో అమితాబ్‌ బచ్చన్‌, ఫహాద్‌ ఫాజిల్‌, రానా కీలక పాత్రలు పోషిస్తున్నారు. ఇది పూర్తయ్యాక లోకేశ్‌ కనగరాజ్‌ దర్శకత్వంలో నటిస్తారు.