Rakul Preet Singh: ట్రెండింగ్‌లో రకుల్‌ ప్రీత్‌ సింగ్‌.. కారణమిదే!

ఇంటర్నెట్‌ డెస్క్‌: హీరోయిన్‌ రకుల్‌ ప్రీత్‌ సింగ్‌ పేరు ప్రస్తుతం సోషల్‌మీడియాలో ట్రెండ్‌ అవుతోంది. ఆమె పెళ్లిపై వస్తోన్న వార్తలతో పాటు తాజాగా ఓ భారీ బడ్జెట్‌లో ఆమెను ఎంపిక చేసినట్లు ప్రచారం జోరందుకుంది. బాలీవుడ్‌ ప్రొడ్యూసర్లతో కలిసి నిర్మాత అల్లు అరవింద్‌ రామాయణాన్ని తెరకెక్కించే ప్రయత్నాలు చేస్తోన్న సంగతి తెలిసిందే. నితేశ్‌ తివారీ (Nitesh Tiwari) దీనికి దర్శకత్వం వహించనున్నారు. ఇందులో ఓ కీలక పాత్ర కోసం చిత్రబృందం రకుల్‌ను సంప్రదించినట్లు వార్తలు వస్తున్నాయి.

ఇప్పటికే ఈ చిత్రంలో రాముడిగా బాలీవుడ్‌ హీరో రణ్‌బీర్‌ కపూర్‌ (Ranbir Kapoor) దాదాపుగా ఖాయమయ్యారు. సీత పాత్ర కోసం సాయిపల్లవి, జాన్వీకపూర్‌ పేర్లు పరిశీలనలో ఉన్నాయి. ఇక మరో ముఖ్యమైన శూర్పణఖ పాత్రలో రకుల్‌ను ఓకే చేసినట్లు ప్రచారం జరుగుతోంది. ఈ పాత్ర కోసం మూవీ యూనిట్‌ ఆమెను సంప్రదించగా వెంటనే గ్రీన్‌ సిగ్నల్‌ ఇచ్చినట్లు వార్తలు వస్తున్నాయి. త్వరలోనే లుక్‌ టెస్ట్‌ నిర్వహించనున్నట్లు తెలుస్తోంది. ఈ సినిమాలో రావణుడిగా యశ్‌ (Yash), విభీషణుడిగా విజయ్‌ సేతుపతి, హనుమంతుడిగా బాబీ దేవోల్‌ కనిపించనున్నట్లు సమాచారం. ఇందులో తన వాయిస్ మాడ్యులేషన్‌ కోసం రణ్‌బీర్‌ ప్రత్యేక శిక్షణ తీసుకుంటున్నట్లు టాక్‌. దీనిపై అధికారిక ప్రకటన కోసం అభిమానులు ఎదురుచూస్తున్నారు.

‘సైంధవ్‌’లో ఈ మార్పులు చేసుంటే బాగుండేది..: పరుచూరి గోపాలకృష్ణ

మరోవైపు రకుల్‌ ప్రీత్ సింగ్‌ పెళ్లికి సంబంధించిన వార్త కూడా ప్రస్తుతం ఎక్స్‌లో చక్కర్లు కొడుతోంది. జాకీ భగ్నానీ (Jackky Bhagnani)తో రకుల్‌ పెళ్లి ఫిబ్రవరి 22న గోవాలో జరగనున్నట్లు వార్తలు వస్తున్నాయి. ఇప్పటికే ఈ వేడుకకు సంబంధించిన పనులు మొదలయ్యాయంటున్నారు. కుటుంబసభ్యులు, సన్నిహితుల సమక్షంలో వీరి పెళ్లి జరగనుందని, ఆ తర్వాత సినీ ప్రముఖుల కోసం ముంబయిలో రిసెప్షన్‌ ఏర్పాటుచేయనున్నట్లు తెలుస్తోంది. ఇటీవల రకుల్‌ తన స్నేహితులకు గోవాలో పార్టీ ఇచ్చిన సంగతి తెలిసిందే. ఆ పొటోలు కూడా వైరలయ్యాయి.