Rana-Teja: ‘నేనే రాజు నేనే మంత్రి’ కాంబో రిపీట్‌

హైదరాబాద్‌: ‘నేనే రాజు నేనే మంత్రి’ (Nene Raju Nene Mantri)తో హిట్‌ అందుకుని క్రేజీ కాంబోగా టాలీవుడ్‌లో పేరు తెచ్చుకున్నారు నటుడు రానా (Rana) - దర్శకుడు తేజ (Teja). దాదాపు ఆరేళ్ల తర్వాత వీరిద్దరి కలయికలో ఓ సరికొత్త చిత్రం తెరకెక్కనుంది. పవర్‌ఫుల్‌ యాక్షన్‌ ఎంటర్‌టైనర్‌గా సిద్ధం కానున్న ఈ చిత్రానికి గోపీనాథ్‌ ఆచంట నిర్మాతగా వ్యవహరించనున్నారు. మలయాళీ చిత్ర పరిశ్రమకు చెందిన ఓ స్టార్‌హీరో ఇందులో కీలకపాత్ర పోషించనున్నారు. అలాగే, ఈ సినిమాలో రానా పాత్ర మరింత పవర్‌ఫుల్‌గా ఉండనుంది. త్వరలోనే ఇది పట్టాలెక్కనుందని చిత్రబృందం నుంచి అధికారిక ప్రకటన వెలువడింది.

రానా సోదరుడు అభిరామ్‌ హీరోగా తేజ ఇటీవల ‘అహింస’ చిత్రాన్ని తెరకెక్కించారు. విభిన్నమైన ప్రేమకథతో తెరకెక్కిన ఈ సినిమా త్వరలో ప్రేక్షకుల ముందుకు రానుంది. అలాగే, రానా ఇటీవల ‘రానా నాయుడు’ సిరీస్‌తో ప్రేక్షకులను అలరించారు. త్వరలోనే ఈ సిరీస్‌కు సీక్వెల్‌గా ‘రానా నాయుడు -2’ రూపుదిద్దుకోనుంది. ‘అహింస’ సినిమా రిలీజ్‌ అయ్యాక రానా - తేజ కాంబోలో సినిమా మొదలయ్యే అవకాశం ఉన్నట్లు సమాచారం.