Rana: నేను టెర్మినేటర్‌ని.. శస్త్రచికిత్సలపై మరోసారి మాట్లాడిన రానా

ఇంటర్నెట్‌ డెస్క్‌: తన తొలి వెబ్‌సిరీస్‌ ‘రానా నాయుడు’ (Rana Naidu) ప్రచారంలో బిజీగా ఉన్నారు ప్రముఖ హీరో రానా దగ్గుబాటి (Rana Daggubati). తన బాబాయ్‌, కథానాయకుడు వెంకటేశ్‌తో కలిసి నటించిన ఈ సిరీస్‌ ఇటీవల ఓటీటీ ‘నెట్‌ఫ్లిక్స్‌’ (Netflix)లో విడుదలైన సంగతి తెలిసిందే. ఈ సందర్భంగా ఆయన పలు మీడియా సంస్థలకు ఇంటర్వ్యూ ఇస్తున్నారు. ఓ ముఖాముఖిలో తాను ఎదుర్కొన్న ఆరోగ్య సమస్యల గురించి మాట్లాడారు. కిడ్నీ, కంటి సమస్యతో బాధపడినట్టు చెప్పారు.

‘‘కార్నియా ట్రాన్స్‌ప్లాంట్‌ (కంటికి సంబంధించిన) గురించి మాట్లాడే కొద్ది మంది వ్యక్తుల్లో నేనొకణ్ని అనుకుంటున్నా. నా కుడి కన్ను సరిగా కనిపించేది కాదు. కిడ్నీ సమస్య కూడా ఎదుర్కొన్నా. రెండింటికీ వైద్యులు శస్త్రచికిత్స చేశారు. ఈ విషయంలో నేను టెర్మినేటర్‌ని అనుకుంటున్నా (నవ్వుతూ..). చాలా మంది శారీరక సమస్యలు వస్తే  బాధపడుతుంటారు. కొన్నాళ్లకు ఆ ప్రాబ్లమ్స్‌ క్లియర్‌ అయినా ఫీల్‌ అవుతూనే ఉంటారు. అలాకాకుండా ఆ ఆలోచనల నుంచి బయటకు వచ్చి ముందుకెళ్లాలి’’ అని రానా పేర్కొన్నారు. ఓ కార్యక్రమం వేదికగా 2016లో తన కంటి సమస్య గురించి రానా తొలిసారి మాట్లాడారు. ఆ తర్వాత, సమంత హోస్ట్‌గా వ్యవహరించిన ఓ షోలోనూ కంటి చికిత్స గురించి, కిడ్నీ పాడైందని  చెప్పారు.