Rana: జాతీయ అవార్డుల కాంట్రవర్సీపై స్పందించిన రానా.. ఏమన్నారంటే?

హైదరాబాద్‌: కేంద్ర ప్రభుత్వం జాతీయ అవార్డులను ఇటీవల ప్రకటించిన సంగతి తెలిసిందే. అయితే ఆ లిస్ట్‌లో సూర్య హీరోగా నటించిన ‘జైభీమ్‌’ (Jai Bhim) సినిమా లేకపోవడంతో ఎంతో మంది నిరాశపడ్డారు. అభిమానుల నుంచి సినీ ప్రముఖుల వరకూ దీనిపై స్పందిస్తూ ట్వీట్స్‌ చేశారు. వాటిలో కొన్ని తీవ్ర చర్చనీయాంశం కాగా.. మరికొన్ని వివాదాలకు దారితీశాయి. తాజాగా దీనిపై హీరో రానా స్పందించారు. సైమా అవార్డులకు సంబంధించి హైదరాబాద్‌లో ఏర్పాటు చేసిన విలేకర్ల సమావేశంలో దీనిపై మాట్లాడారు.

‘‘సినిమాల విషయంలో అందరికీ ఒకే రకమైన అభిప్రాయాలు ఉండవు. మీ అందరికీ ఒక చిత్రం నచ్చి ఉండొచ్చు. నాకు మరొకటి బాగుందనిపించవచ్చు. నటుల అభిరుచులు కూడా అలానే ఉంటాయి. ‘జైభీమ్‌’ సినిమా కథకు జాతీయ అవార్డు వస్తుందని చాలా మంది అనుకున్నారు. కానీ అది ఎంపిక కాలేదు. దీంతో కొందరు వారి అభిప్రాయాన్ని తెలుపుతూ ట్వీట్స్‌ చేశారు. అంతేకానీ కాంట్రవర్సీ చేయాలని కాదు. వాళ్లు కేవలం ట్వీట్‌ మాత్రమే చేశారు. కొందరు దాన్ని కాంట్రవర్సీగా మార్చారు. మా (ఆర్టిస్టుల) మధ్య ఎలాంటి వివాదాలు ఉండవు’’ అని రానా అన్నారు.

ఇక జాతీయ అవార్డులు ప్రకటించిన తర్వాత చాలా మంది ప్రముఖులు ‘జైభీమ్‌’ విషయంలో ట్వీట్స్‌ చేశారు. హీరో నాని ( Nani) కూడా ‘జైభీమ్‌’కు జాతీయ అవార్డు రాకపోవడంతో తన హృదయం ముక్కలైందని ఇన్‌స్టా స్టోరీలో అభిప్రాయాన్ని పంచుకున్నారు. ఇక తమిళ చిత్రపరిశ్రమకు చెందిన సినీ, రాజకీయ ప్రముఖులు కూడా ఈ అవార్డులపై పలు ఇంటర్వ్యూల్లో మాట్లాడిన సంగతి తెలిసిందే.