Ranbir Kapoor: నా గడ్డం కారణంగానే ఆ సినిమా హిట్‌ అవ్వలేదు...

హైదరాబాద్‌: బాలీవుడ్‌ స్టార్‌ హీరో రణబీర్‌ కపూర్‌(Ranbir Kapoor) నాలుగు సంవత్సరాల విరామం తర్వాత షంషేరా(Shamshera), బ్రహ్మస్త్ర(Brahmastra) సినిమాల్లో నటించారు. అయాన్‌ ముఖర్జీ(Ayan Mukerji) దర్శకత్వం వహించిన బ్రహ్మస్త్ర సినిమా మంచి గుర్తింపుతో ప్రేక్షకాదరణ పొందింది. అయితే కరణ్‌ మల్హోత్రా తెరకెక్కించిన షంషేరా చిత్రం బాక్సాఫీసు వద్ద వైఫల్యాన్ని చవిచూసింది. తాజాగా రెడ్‌ సీ ఇంటర్నేషనల్‌ ఫిల్మ్‌ ఫెస్టివల్‌ 2022(Red Sea International Film Festival)లో ఆ సినిమా ఎందుకు అలరించలేకపోయిందో రణబీర్‌ చెప్పాడు. 

తాను చేసిన అతి కష్టమైన సినిమాల్లో షంషేరా ఒకటని వెల్లడించిన రణబీర్‌ ‘ఈ సినిమా పరాజయం పొందడం వెనక మేము చేసిన పొరపాట్లు కూడా ఉన్నాయి. వాటిలో ఒకటి నా గడ్డం. నేను ఈ సినిమా కోసం కృత్రిమ గడ్డాన్ని పెట్టుకున్నాను. ఎండలో షూటింగ్‌ చేసేటప్పుడు అది సహజంగా కనిపించలేదు. ముఖానికి అతుక్కున్నట్లు కనిపించేది. అందుకే  ఈ సినిమా హిట్‌ అవ్వలేదని అనుకుంటా’ అన్నారు.  రణబీర్‌ ద్విపాత్రాభినయం చేసిన ఈ సినిమాలో సంజయ్ దత్, వాణి కపూర్, రోనిత్ రాయ్, సౌరభ్ శుక్లా నటించారు. అలాగే తన కెరీర్‌లో 2017లో విడుదలైన జగ్గా జూసూస్‌ సినిమా హిట్‌ అవ్వకపోవడం తననెంతో బాధించిందని రణబీర్‌ తెలిపాడు. కొవిడ్‌ కారణంగా చిత్రపరిశ్రమ ఎన్నో ఇబ్బందులు ఎదుర్కొందని, బలమైన కథనాలతో నూతనోత్తేజంతో భారతీయ సినిమా తిరిగి రావాలని ఆయన ఆకాంక్షించారు.