Sathya: హాలీవుడ్‌ ఫిల్మ్‌ ఫెస్టివల్‌ వేదికపై సాయి ధరమ్‌ తేజ్‌ షార్ట్‌ ఫిల్మ్

ఇంటర్నెట్‌ డెస్క్‌:  సాయి ధరమ్ తేజ్‌ (Sai Dharam tej), కలర్స్‌ స్వాతి ప్రధానపాత్రల్లో నటించిన లఘు చిత్రం ‘సత్య’ (Satya). ఇప్పటికే ఈ షార్ట్‌ ఫిల్మ్ పలు అవార్డులను సొంతం చేసుకుంది. తాజాగా దీనికి మరో అరుదైన గౌరవం దక్కింది. ఈ విషయాన్ని తెలుపుతూ సాయి ధరమ్ తేజ్‌ పోస్ట్ పెట్టారు.

‘నాకెంతో ఇష్టమైన షార్ట్‌ ఫిల్మ్‌ ‘సత్య’ను.. డిసెంబర్‌ 9న హాలీవుడ్‌ బీఎల్‌వీడీ ఫిల్మ్‌ ఫెస్టివల్‌లో ప్రదర్శించనున్నారు. ఈ వేడుకను మా షార్ట్‌ ఫిల్మ్‌ స్క్రీనింగ్‌తోనే మొదలు పెట్టడం ఎంతో గౌరవంగా ఉంది. ఇది మా టీమ్ అందరికీ గర్వకారణం. కాలిఫోర్నియాకు దగ్గరలో ఉండే వాళ్లు ఆ వేడుకకు హాజరై ‘సత్య’ను చూసి మమ్మల్ని ఆశీర్వదించాలని కోరుకుంటున్నా’ అని పోస్ట్‌ చేశారు. దీంతో అభిమానులు టీమ్‌కు అభినందనలు తెలుపుతున్నారు. ఇక ఇటీవలే ఈ షార్ట్‌ ఫిల్మ్‌ను న్యూయార్క్‌లోని అంతర్జాతీయ ఒనిరోస్‌ ఫిల్మ్‌ అవార్డ్స్‌ వేదికపై ప్రదర్శించగా.. ఇది రెండు అవార్డులను పొందింది. సైనికులకు నివాళులర్పిస్తూ ఇందులో ‘సోల్ ఆఫ్ సత్య’అనే పాటను రూపొందించారు. దాన్ని ఆగస్టు 15న విడుదల చేయగా మంచి వ్యూస్‌తో ప్రశంసలు పొందింది.