Shraddha Kapoor: ఓ స్త్రీ మళ్లీ వస్తోంది

‘ఓ స్త్రీ రేపు రా’ అంటూ ఓ ఊరినంత భయపెట్టిన ‘స్త్రీ’ మరోసారి తెరపైకి రావడానికి సిద్ధమవుతోంది. ఆ పాత్రలో అలరించిన శ్రద్ధా కపూర్‌ మరోసారి ‘స్త్రీ 2’లోనూ సందడి చేయనుంది. ఆమె, రాజ్‌కుమార్‌ రావ్‌ ప్రధాన పాత్రల్లో నటిస్తున్న చిత్రమిది. మంచి విజయాన్ని అందుకున్న ‘స్త్రీ’కి కొనసాగింపుగా అమర్‌ కౌశిక్‌ తెరకెక్కిస్తున్నారు. ఇటీవలే చిత్రీకరణను ప్రారంభించినట్లు తెలిపింది చిత్రబృందం. ఇందులో కీలక పాత్రలో నటిస్తున్న అభిషేక్‌ బెనర్జీ.. ఈ సినిమా గురించి కొన్ని ఆసక్తికర విషయాలను పంచుకున్నారు. ‘తొలిభాగం కంటే రెట్టింపు వినోదంతో ఈ సినిమా ఉండబోతుంది. ప్రస్తుతం నిర్మాణానంతర పనులు శరవేగంగా జరుగుతున్నాయి. ఇప్పుడు రాబోయే సీక్వెల్‌తో మరోసారి దర్శకుడు అమర్‌ కౌశిక్‌ తను సృష్టించిన ప్రత్యేక ప్రపంచంతో సినీప్రియుల్ని ఆశ్చర్యపరుస్తారనే నమ్మకం ఉంద’ని చెప్పుకొచ్చారు. ఇందులో తమన్నా ఓ ప్రత్యేక గీతంతో కనిపించనున్నట్లు తెలుస్తుంది. త్వరలో టీజర్‌ను విడుదల చేయడానికి సన్నాహాలు చేస్తున్నట్లు సమాచారం. ఆగస్టు 30న విడుదల కానుందీ చిత్రం.