Shruti Haasan: చరిత్రలో దాగున్న కథలను చూపిస్తాం

‘సలార్‌’... ఇటీవల విడుదలైన ఈ సినిమాలో ఆద్య పాత్రలో తనదైన నటనతో సినీప్రియులను మెప్పించింది నాయిక శ్రుతిహాసన్‌. ఇప్పుడామె అంతర్జాతీయ స్థాయిలో తన ప్రతిభను నిరూపించుకోవడానికి ముస్తాబవుతోంది. ఆమె ప్రధాన పాత్రలో నటిస్తున్న చిత్రం ‘చెన్నై స్టోరీ’. బాఫ్టా పురస్కార విజేత ఫిలిప్‌ జాన్‌ ఈ చిత్రాన్ని తెరకెక్కిస్తున్నారు. ‘ది అరేంజ్‌మెంట్స్‌ ఆఫ్‌ లవ్‌’ అనే నవల ఆధారంగా ఇండియన్‌-బ్రిటన్‌ నేపథ్యంలో రొమాంటిక్‌ కామెడీ చిత్రంగా దీన్ని రూపొందిస్తున్నారు. ఈ సందర్భంగా శ్రుతిహాసన్‌ తన సంతోషాన్ని అభిమానులతో పంచుకుంటూ..‘చెన్నై నుంచి వచ్చిన నాకు.. దాని వైవిధ్యత, విశిష్టతను చూపించే ఈ కథ చాలా ప్రత్యేకమైనది. ఇలాంటి అంతర్జాతీయ దర్శకనిర్మాతలతో కలిసి చరిత్రలో దాగి ఉన్న ఎన్నో కథలను ప్రపంచానికి సినిమా రూపంలో చూపించడానికి సిద్ధంగా ఉన్నాను’ అంటూ చెప్పుకొచ్చింది. త్వరలో ఈ సినిమా సెట్స్‌ పైకి వెళ్లనున్నట్లు తెలిపింది చిత్రబృందం. ఆమె నటించిన మరో ఆంగ్ల చిత్రం ‘ది ఐ’ లండన్‌ ఇండిపెండెంట్‌ చిత్రోత్సవాల్లో ప్రదర్శితమైంది.