Adivi Sesh: అడివి శేష్ సరసన శ్రుతి హాసన్‌.. నిర్మాత ఎవరంటే!

ఇంటర్నెట్‌ డెస్క్‌: వైవిధ్యమైన కథలను ఎంచుకుంటారు హీరో అడివి శేష్‌ (Adivi Sesh). గతేడాది ‘మేజర్‌’, ‘హిట్‌2’ లాంటి విజయవంతమైన చిత్రాలతో ఆకట్టుకున్న ఆయన తాజాగా తన కొత్త ప్రాజెక్ట్‌ను ప్రకటించారు. ఈ చిత్రంతో షనియల్‌ డియో అనే కొత్త దర్శకుడు ఇండస్ట్రీకి పరిచయం కానున్నారు. ఇది పాన్‌ ఇండియా చిత్రంగా తెరకెక్కుతున్నట్లు తెలిపారు.

యాక్షన్‌ ఎంటర్‌టైనర్‌గా రానున్న ఈ చిత్రంలో అడివి శేష్‌కు జోడీగా శ్రుతి హాసన్ నటించనుంది. ఈ భారీ బడ్జెట్‌ చిత్రాన్ని అన్నపూర్ణ స్టూడియోస్‌ సమర్పణలో సుప్రియ యార్లగడ్డ నిర్మించనున్నారు. త్వరలోనే దీనికి సంబంధించిన పూర్తి వివరాలను వెల్లడించనున్నారు. ఇక దర్శకుడు షనియల్‌ డియో విషయానికొస్తే.. అడివి శేష్ నటించిన ‘క్షణం’, ‘గూఢాచారి’ లాంటి సినిమాలకు ఆయన పనిచేశారు. ఈ సినిమాతో దర్శకుడిగా మారనున్నారు. గతంలో ఆయన తీసిన ఓ షార్ట్‌ ఫిల్మ్ కేన్స్‌ ఫిల్మ్‌ ఫెస్టివల్‌కు అధికారికంగా ఎంపికైంది. ప్రస్తుతం అడివి శేష్‌ సినిమాకు దర్శకత్వం మాత్రమే కాకుండా స్టోరీ కూడా అందిస్తున్నారు.

రహస్యాలు అడగొద్దు.. నేను అబద్ధాలే చెబుతాను : అనన్యతో డేటింగ్‌పై ఆదిత్యరాయ్‌ కామెంట్‌

ఇక ప్రస్తుతం అడివి శేష్‌ ‘జీ 2’ (Goodachari 2) పనుల్లో బిజీగా ఉన్నారు. 2018లో విడుదలైన ఈ చిత్రం బాక్సాఫీస్‌ వద్ద విజయాన్ని అందుకుంది. చిత్రానికి ఫ్రాంచైజీగా ‘జీ 2’ తెరకెక్కుతోంది. దీనికి అడివి శేష్ స్వయంగా కథను అందించారు. ఐదు దేశాల్లో ఈ సినిమాను షూట్‌ చేయనున్నారు. ఇందులో శేష్ సరసన బనితా సంధు నటించనుంది. పీపుల్‌ మీడియా ఫ్యాక్టరీ, ఏకే ఎంటర్‌టైన్‌మెంట్స్‌, అభిషేక్‌ అగర్వాల్‌ ఆర్ట్స్‌ సంస్థలు సంయుక్తంగా నిర్మిస్తున్నాయి.