Skanda: ‘స్కంద’.. ప్రచార మెరుపు

‘స్కంద’గా సందడి చేసేందుకు సిద్ధమవుతున్నారు కథానాయకుడు రామ్‌ పోతినేని. ఆయన.. శ్రీలీల జంటగా నటించిన ఈ చిత్రాన్ని బోయపాటి శ్రీను తెరకెక్కించిన సంగతి తెలిసిందే. శ్రీనివాస చిట్టూరి నిర్మాత. ఈ సినిమా వచ్చే నెల 15న తెలుగు, తమిళం, హిందీ, కన్నడ, మలయాళ భాషల్లో ఒకేసారి విడుదల కానుంది. ఈ నేపథ్యంలోనే ప్రచార పర్వంలో భాగంగా ఈ నెల 26న ప్రీరిలీజ్‌ థండర్‌ పేరుతో ఓ ప్రచార చిత్రం విడుదల చేయనున్నారు. ఈ విషయాన్ని చిత్ర బృందం అధికారికంగా ప్రకటించింది. ఈ మేరకు ఓ కొత్త పోస్టర్‌ను నెట్టింట పంచుకుంది. అందులో రామ్‌ పంచెకట్టుతో.. శ్రీలీల లంగా ఓణీలో పొలాల మధ్య కూర్చొని చిరునవ్వులు చిందిస్తూ కనిపించారు. మాస్‌ యాక్షన్‌ కథాంశంతో రూపొందిన ఈ చిత్రంలో రామ్‌ రెండు కోణాలున్న పాత్రలో కనిపించనున్నారు. ఈ సినిమాకి సంగీతం: తమన్‌, కూర్పు: తమ్మిరాజు, ఛాయాగ్రహణం: సంతోష్‌ డిటాకే.