Japan movie ott release: ఓటీటీలో ‘జపాన్‌’.. స్ట్రీమింగ్‌ తేదీ ఖరారు!

హైదరాబాద్‌: కార్తి (Karthi) కథానాయకుడిగా రాజు మురుగన్‌ దర్శకత్వంలో రూపొందిన యాక్షన్ కామెడీ చిత్రం ‘జపాన్‌’. అను ఇమ్మాన్యుయేల్‌ (Anu Emmanuel) కథానాయిక. నవంబరు 10న ప్రేక్షకుల ముందుకు వచ్చిన ఈ సినిమా బాక్సాఫీస్‌ వద్ద ఆశించిన విజయాన్ని అందుకోలేకపోయింది. కార్తి 25వ చిత్రం కావడం, క్యారెక్టరైజేషన్‌ కూడా విభిన్నంగా ఉండటంతో విడుదలకు ముందు సినిమాపై అంచనాలు భారీగా ఉన్నాయి. కానీ, కథ, కథనాల పరంగా లోపాలు ఉండటంతో ప్రేక్షకులు ఆదరించలేకపోయారు. ఈ క్రమంలో ఓటీటీ వేదికగా ‘జపాన్‌’ (Japan movie ott release) విడుదలయ్యేందుకు సిద్ధమైంది. డిసెంబరు 11వ తేదీ నుంచి ప్రముఖ ఓటీటీ నెట్‌ఫ్లిక్స్‌ వేదికగా తమిళ, తెలుగు, కన్నడ, మలయాళ భాషల్లో స్ట్రీమింగ్‌ కానుంది.

కథేంటంటే: జపాన్ ముని (కార్తి) ఓ పేరు మోసిన దొంగ‌. దోపిడీకి వ్యూహం ప‌న్నాడంటే గురి త‌ప్ప‌దంతే. పోలీసుల్ని సైతం ఎదిరించి అనుకున్న‌ది కాజేస్తాడు. ఓ దోపిడీకి పాల్పడుతున్నప్పుడు పోలీస్ అధికారుల‌కు చెందిన కొన్ని ర‌హ‌స్య‌ వీడియోలు చేతికి దొరుకుతాయి. వాటిని త‌న ద‌గ్గ‌రే ఉంచుకున్న జ‌పాన్ పోలీసుల‌కు టార్గెట్‌గా మార‌తాడు. ఎలాగైనా ఆ వీడియోల్ని సొంతం చేసుకుని జ‌పాన్‌ని మ‌ట్టుబెట్టాల‌ని పోలీస్ అధికారులు శ్రీధ‌ర్ (సునీల్‌), భ‌వాని (విజ‌య్ మిల్ట‌న్‌) రంగంలోకి దిగుతారు. మ‌రోవైపు క‌ర్ణాట‌క పోలీసులు కూడా జ‌పాన్‌ని వెంబ‌డిస్తుంటారు. ఈ క్ర‌మంలోనే ఓ నగల దుకాణంలో రూ.200 కోట్ల విలువ చేసే న‌గ‌లు దోపిడీకి గుర‌వుతాయి. ఆ దొంగ‌త‌నం జపాన్ చేశాడ‌ని పోలీసుల‌కు ఆధారాలు దొరుకుతాయి. అయినా స‌రే, ఓ అమాయ‌కుడు ఆ కేసులో ఇరుక్కొంటాడు.ఇంత‌కీ ఆ దొంగ‌త‌నం ఎవ‌రు చేశారు? జ‌పాన్ దొరికాడా? ఆ అమాయ‌కుడు ఈ కేసు నుంచి బ‌య‌ట‌ప‌డ్డాడా?అస‌లు జపాన్ ఎలా దొంగ‌గా మారాడు?సినీ న‌టి సంజు (అను ఇమ్మానుయేల్‌)తో జ‌పాన్‌కి ఉన్న బంధం ఏమిటి? తెలియాలంటే సినిమా చూడాల్సిందే.

‘జపాన్‌’ మూవీ పూర్తి రివ్యూ కోసం క్లిక్‌ చేయండి