Vidudhala: ఓటీటీలోకి ‘విడుదల 1’ తెలుగు వెర్షన్‌ వచ్చేసింది..

హైదరాబాద్‌: సూరి (Soori), విజయ్‌ సేతుపతి (Vijay Sethupathi) ప్రధాన పాత్రల్లో వెట్రిమారన్‌ తెరకెక్కించిన కోలీవుడ్‌ సినిమా ‘విడుదలై పార్ట్‌ 1’ (Viduthalai Part 1). ఇదే చిత్రాన్ని తెలుగులో ‘విడుదల పార్ట్‌ 1’గా విడుదల చేశారు. ఇక, ఇప్పటికే ఓటీటీ వేదికగా సినీ ప్రియులకు చేరువలో ఉన్న ఈ సినిమా తెలుగు వెర్షన్‌ తాజాగా అందుబాటులోకి వచ్చింది. ఈ మేరకు జీ5 ఓటీటీ వేదికగా ఇకపై ‘విడుదల పార్ట్‌ 1’ తెలుగు డబ్బింగ్‌ వెర్షన్‌ తెలుగువారికి వినోదాన్ని అందించనుంది.

సినిమా స్టోరీ ఏంటంటే..?

కుమ‌రేశ‌న్ (సూరి) ఓ పోలీస్ కానిస్టేబుల్‌. ప్రజాద‌ళం నాయ‌కుడైన పెరుమాళ్‌(విజ‌య్ సేతుప‌తి)ని ప‌ట్టుకునేందుకు ప‌నిచేస్తున్న ప్రత్యేక‌ పోలీస్ ద‌ళంలో డ్రైవ‌ర్‌గా చేర‌తాడు. ప్రజ‌ల‌కి క‌ష్టం వ‌స్తే ఆదుకోవ‌డ‌మే పోలీస్ విధి అనేది ఆయ‌న న‌మ్మిన సిద్ధాంతం. అనుకోకుండా అడ‌విలో ఓ మ‌హిళ‌పై ఎలుగుబంటి దాడి చేయ‌డంతో ఆమెని ఆస్పత్రిలో చేర్పించేందుక‌ని పోలీస్ జీప్‌ని వాడ‌తాడు. దాంతో పైఅధికారుల ఆగ్రహానికి గుర‌వుతాడు.(Viduthala telugu review) క్షమాప‌ణ చెప్పాల్సిందే అంటాడు అధికారి. కుమ‌రేశ‌న్ మాత్రం త‌ప్పు చేయ‌లేదు కాబ‌ట్టి క్షమాప‌ణ చెప్పనంటాడు. మ‌రోవైపు గాయ‌ప‌డిన ఆ మ‌హిళ మ‌న‌వరాలు పాప (భ‌వానీ శ్రీ)తో కుమ‌రేశ‌న్ స్నేహం చేస్తాడు. అది కాస్త ప్రేమ‌కి దారితీస్తుంది. ఒక ప‌క్క ప్రేమ‌, ఇంకోవైపు పెరుమాళ్ కోసం సాగించే వేట‌లో కుమ‌రేశ‌న్ ఎలాంటి సంఘ‌ర్షణ‌కి గుర‌వుతాడ‌న్న ఆసక్తికర కథాంశంతో ‘విడుదలై పార్ట్‌1’ రూపుదిద్దుకుంది. ఏప్రిల్‌లో విడుదలైన ఈ సినిమా తమిళంలో మంచి విజయాన్ని నమోదు చేసుకుంది. సూరి, విజయ్‌ సేతుపతి నటనకు మంచి మార్కులు పడ్డాయి. దీంతో ఈ చిత్రాన్ని ‘విడుదల పార్ట్‌1’ పేరుతో తెలుగులో విడుదల చేసినప్పటికీ అనుకున్నంత విజయాన్ని అందుకోలేకపోయింది.