Vikram: ‘తంగలాన్‌’ అంటే అర్థమదే.. అందుకే బరువు తగ్గా: విక్రమ్‌

హైదరాబాద్‌: ప్రముఖ నటుడు విక్రమ్‌ (Vikram) హీరోగా దర్శకుడు పా. రంజిత్‌ తెరకెక్కించిన చిత్రం ‘తంగలాన్‌’ (Thangalaan). వచ్చే ఏడాది జనవరి 26న ప్రేక్షకుల ముందుకు రానుంది. ఈ సందర్భంగా చిత్రబృందం బుధవారం ఉదయం చెన్నైలో, సాయంత్రం హైదరాబాద్‌లో టీజర్‌ లాంచ్‌ ఈవెంట్‌ నిర్వహించింది. హైదరాబాద్‌లో ఏర్పాటైన ఈవెంట్‌కు విక్రమ్‌, దర్శకుడు రంజిత్‌, నిర్మాత జ్ఞానవేల్‌ రాజా తదితరులు హాజరయ్యారు. మీడియా అడిగిన ప్రశ్నలకు సమాధానమిచ్చారు. ఆ వివరాలివీ..

‘తంగలాన్‌’.. భారతీయ చిత్ర పరిశ్రమను ఆశ్చర్యపరుస్తుంది: విక్రమ్‌

* రిపబ్లిక్‌ డే రోజున సినిమాని విడుదల చేస్తున్నారు. సినిమాలో ఆ నేపథ్యం ఉంటుందా?

నిర్మాత: లేదండీ.. రిపబ్లిక్‌ డేకు, సినిమా కథకు ఎలాంటి సంబంధం ఉండదు. ఇతర చిత్రాలతో పోటీపడకుండా విడిగా వద్దామనుకుంటున్నామంతే. అందుకే సంక్రాంతికి కాకుండా రిపబ్లిక్‌ డే నాడు రిలీజ్‌ చేస్తున్నాం.

* మీ అబ్బాయితోపాటు ఇతర యంగ్‌ హీరోలతో పోటీ పడేందుకే బరువు తగ్గారా?

విక్రమ్‌: అలాంటిదేం లేదు. పాత్ర డిమాండ్‌ మేరకు బరువు తగ్గా.

* తెలుగు దర్శకులతో మళ్లీ సినిమాలు చేస్తారా? ఎవరి దర్శకత్వంలో నటించాలనుకుంటున్నారు?

విక్రమ్‌: తెలుగు దర్శకులందరూ నాకు ఇష్టమే. ముందుగా రాజమౌళి. మంచి కథ ఏ డైరెక్టర్‌ చెప్పినా వారితో చేస్తా.

* ‘తంగలాన్‌’ అంటే అర్థం ఏంటి?

విక్రమ్‌: అదొక తెగ పేరు.

* ఇలాంటి కథలనే మీరు తెరకెక్కిస్తున్నారు?

దర్శకుడు: ఇప్పటి వరకు ఎవరూ చర్చించని కథలను నేను తెరపైకి తీసుకురావాలనుకుంటా.

* కోలీవుడ్‌ సినిమాలను తెలుగు ప్రేక్షకులు చూసినంతగా టాలీవుడ్‌ చిత్రాలను తమిళ ఆడియన్స్‌ చూడట్లేదన్న దానిపై మీరేమంటారు?

విక్రమ్‌: తెలుగు సినిమాలు ‘బాహుబలి’, ‘ఆర్‌ఆర్‌ఆర్‌’, కన్నడ చిత్రాలు ‘కేజీయఫ్‌’, ‘కాంతార’ తమిళంలోనూ ఘన విజయం అందుకున్నాయి. మా సినిమాలకంటే ఇతర పరిశ్రమ చిత్రాలే అత్యధిక వసూళ్లు సాధించాయి. 

నిర్మాత: కోలీవుడ్‌లో అత్యధిక వసూళ్లు చేసిన చిత్రం ‘బాహుబలి 2’. కంటెంట్‌ బాగుంటే తమిళ ఆడియన్స్‌ ఏ చిత్రాన్నైనా ఆదరిస్తారు.