vishwak sen: అర్జున్‌ వ్యాఖ్యలు.. విశ్వక్‌సేన్‌ స్పందనేంటో తెలుసా?

హైదరాబాద్‌: విశ్వక్‌సేన్‌ (vishwak sen) వ్యవహారశైలి అన్‌ప్రొఫెషనలిజమంటూ సీనియర్‌ నటుడు అర్జున్‌ (Arjun) చేసిన వ్యాఖ్యలు ప్రస్తుతం ఇండస్ట్రీలో చర్చకు దారితీశాయి. విశ్వక్‌కు నిబద్ధత లేదంటూ అర్జున్‌ కాస్త గట్టిగానే మాట్లాడారు. తనలా మరో నిర్మాతకు జరగకుండా ప్రొడ్యూసర్స్‌ గిల్డ్‌కు ఫిర్యాదు చేయనున్నట్లు చెప్పారు.  ఈ క్రమంలో కథానాయకుడు విశ్వక్‌సేన్‌ సిబ్బంది స్పందించారు. సంభాషణలు, పాటలు, మ్యూజిక్‌ విషయంలో విశ్వక్‌ సూచనలు చేసిన మాట వాస్తవమేనని చెప్పారు. ఆసక్తికరంగా అనిపించిన చిన్న చిన్న మార్పులకు కూడా అర్జున్‌ అస్సలు అంగీకరించడం లేదని, తాను చెప్పినట్లే నడుచుకోవాలని అంటున్నారని వారు తెలిపారు. విశ్వక్‌ మాటకు సెట్‌లో అస్సలు గౌరవం ఉండదని చెప్పారు. అందుకే విశ్వక్‌ మనసుకు నచ్చని పని  చేయలేక, సినిమా నుంచి బయటకు వచ్చినట్లు తెలిపారు. తాజా సినిమాకు సంబంధించిన రెమ్యునరేషన్‌, అగ్రిమెంట్‌ పత్రాలను విశ్వక్‌ నిర్మాతల మండలికి పంపినట్లు తెలిపారు. అయితే, ఈ పూర్తి వ్యవహారంపై విశ్వక్‌సేన్‌ అధికారికంగా ఎలాంటి ప్రకటనా చేయలేదు. తన సామాజిక మాధ్యమాల్లోనూ ఎలాంటి పోస్ట్‌ పెట్టలేదు. విశ్వక్‌ కూడా తన అభిప్రాయాలను మీడియా ముందుకు వచ్చి చెబుతారా? లేదా? అనేది తెలియాలి.