Chiranjeevi: ఫుల్‌ స్వింగ్‌లో ‘విశ్వంభర’.. అది సినిమాకే హైలైట్‌..!

హైదరాబాద్‌: చిరంజీవి (Chiranjeevi) కథానాయకుడిగా వశిష్ఠ దర్శకత్వంలో రూపొందుతున్న సోషియో ఫాంటసీ ఫిల్మ్‌ ‘విశ్వంభర’ (Vishwambhara). త్రిష (Trisha) కథానాయిక. శరవేగంగా చిత్రీకరణ జరుపుకొంటున్న ఈ సినిమాకు సంబంధించి చిత్రబృందం మరో ఆసక్తికర అప్‌డేట్‌ను పంచుకుంది. ఇటీవల షెడ్యూల్‌లో కొంత టాకీ పార్ట్‌, ఓ పాటను పూర్తి చేయగా, ఇప్పుడు అదిరిపోయే యాక్షన్‌ సీక్వెన్స్‌ను తెరకెక్కిస్తోంది. హైదరాబాద్‌లోని అల్యూమినియం ఫ్యాక్టరీలో ఏర్పాటుచేసిన ప్రత్యేక సెట్‌లో చిరంజీవి, కొంతమంది ఫైటర్ల మధ్య దీన్ని చిత్రీకరిస్తున్నారు. యాక్షన్‌ కొరియోగ్రాఫర్లు రామ్‌ లక్ష్మణ్‌ పర్యవేక్షణలో ఈ షూట్‌ జరుగుతోంది.

భారీ స్థాయిలో చిత్రీకరిస్తున్న ఈ యాక్షన్‌ సీక్వెన్స్‌ సినిమాకే హైలైట్‌గా నిలవనుందని చిత్రబృందం చెబుతోంది. థియేటర్‌లో కూర్చొన్న ప్రేక్షకుడికి మరింత థ్రిల్‌ పంచుతుందట. ఈ సినిమా కోసం 13 భారీ సెట్‌లతో ఓ ప్రత్యేక ప్రపంచాన్ని సృష్టించారు. ఇంతకుముందెన్నడూ చూడని సరికొత్త అవతారంలో చిరంజీవి కనిపించనున్నారు. ఇప్పటివరకూ ఆయన నటించిన సినిమాలతో పోలిస్తే, అత్యున్నత సాంకేతిక పరిజ్ఞానంతో ఈ మూవీని తెరకెక్కిస్తున్నారు.

యూవీ క్రియేషన్స్‌ బ్యానర్‌పై దాదాపు రూ.200 కోట్ల భారీ బడ్జెట్‌తో ‘విశ్వంభర’ తీర్చిదిద్దుతున్నట్లు టాక్‌. సోషియో ఫాంటసీ మూవీ కావడంతో వీఎఫ్‌ఎక్స్‌పై ప్రత్యేక శ్రద్ధ పెడుతున్నట్లు తెలుస్తోంది. కీరవాణి సంగీతం అందిస్తున్న ఈ మూవీని వచ్చే ఏడాది సంక్రాంతి కానుకగా జనవరి 10న సినిమాను విడుదల చేసేందుకు సన్నాహాలు చేస్తున్నారు. ఇక ఈ చిత్రంలో త్రిష ద్విపాత్రాభినయం చేస్తున్నట్లు టాక్‌. ఆమెతో పాటు, సురభి, ఇషాచావ్లా తదితరులు కీలక పాత్రలు పోషిస్తున్నారు.