VK singh: ఈ ఎన్నికల్లో పోటీ చేయను.. కేంద్రమంత్రి వీకే సింగ్‌ ప్రకటన

దిల్లీ: లోక్‌సభ ఎన్నిక (Lok Sabha Elections)ల్లో  తాను పోటీ చేయడంలేదని కేంద్రమంత్రి, ఘజియాబాద్‌ భాజపా ఎంపీ జనరల్‌ వీకే సింగ్‌ (VK Singh) ప్రకటించారు. ఈ విషయాన్ని ఆయన ‘ఎక్స్’ వేదికగా వెల్లడించారు. ఈ ప్రయాణంలో తనకు సహకరించిన ప్రతిఒక్కరికీ కృతజ్ఞతలు తెలుపుతూ పోస్ట్‌ పెట్టారు. ఘజియాబాద్‌ నుంచి లోక్‌సభకు ప్రాతినిధ్యం వహిస్తున్న వీకే సింగ్‌.. ప్రస్తుతం కేంద్ర రవాణాశాఖ సహాయమంత్రిగా ఉన్న విషయం తెలిసిందే.

‘‘నా జీవితమంతా దేశానికి ఓ సైనికుడిలా సేవ చేసేందుకే అంకితం. ఘజియాబాద్‌ను ఓ ప్రపంచస్థాయి నగరంగా తీర్చిదిద్దే లక్ష్యంతో పదేళ్ల పాటు అవిశ్రాంతంగా కృషిచేశాను. ఈ క్రమంలో యావత్‌ దేశ ప్రజలు, భాజపా సభ్యుల నుంచి ప్రేమ, విశ్వాసాన్ని పొందాను. ఈ బంధం నాకు వెలకట్టలేనిది.  ఇలాంటి తరుణంలో కష్టమైనా సరే.. ఆలోచించే ఈ నిర్ణయం తీసుకున్నా. 2024 లోక్‌సభ ఎన్నికల్లో నేను పోటీ చేయను. ఈ నిర్ణయం అంత తేలికైనది కాదు.. నా గుండె లోతుల్లోంచి తీసుకున్న నిర్ణయం. నా శక్తి, సమయాన్ని వెచ్చించి ప్రజలకు వేరే మార్గంలో సర్వీసులందించేందుకు కృషిచేస్తాను. ఈ ప్రయాణంలో తమ ప్రేమ, మద్దతును అందించి సహకరించిన అందరికీ కృతజ్ఞతలు’’ అని వీకే సింగ్‌ పేర్కొన్నారు. 

నాకు పోటీ చేయడం ఇష్టంలేదు.. కాన్పూర్‌ ఎంపీ

ఇదిలా ఉండగా.. యూపీలోని కాన్పూర్‌ సిట్టింగ్‌ ఎంపీ సత్యదేవ్‌ పచౌరి కూడా ఈ ఎన్నికల్లో తాను పోటీ చేయడంలేదని ప్రకటించారు. ఈ మేరకు ఆయన కూడా ట్వీట్‌ చేశారు. ‘‘2024లో జరగనున్న లోక్‌సభ ఎన్నికల్లో పోటీ చేయడం నాకు ఇష్టం లేదని మీ అందరికీ తెలియజేయాలనుకుంటున్నా. ఈ నిర్ణయాన్ని ప్రధాని నరేంద్ర మోదీ, భాజపా జాతీయ అధ్యక్షుడు జేపీ నడ్డాకు తెలియ జేశాను. పార్టీకి నమ్మకమైన కార్యకర్తగా, ఇచ్చిన బాధ్యతలను నిర్వహిస్తాను’’ అని పేర్కొన్నారు.