Chhattisgarh polls: పోలింగ్‌ సమీపిస్తున్న వేళ ఛత్తీస్‌గఢ్‌లో పేలిన మందుపాతర .. ఓ జవాన్‌కు గాయాలు

రాయ్‌పుర్: ఛత్తీస్‌గఢ్‌ (Chhattisgarh) రాష్ట్రంలో అసెంబ్లీ ఎన్నికలు జరుగుతున్నాయి. అందులో భాగంగా మంగళవారం తొలివిడత పోలింగ్‌ నిర్వహించనున్నారు. ఈ నేపథ్యంలో నక్సలైట్లు మందుపాతర పేల్చడంతో ఓ జవాన్‌, ఇద్దరు పోలింగ్‌ సిబ్బంది గాయపడ్డారు. కాంకర్‌ జిల్లాలో ఈ ఘటన చోటు చేసుకుంది. పేలుడు కారణంగా బీఎస్‌ఎఫ్‌ జవాన్‌ ప్రకాశ్ చంద్‌ గాయపడినట్లు తెలిసింది. అతడి కాలుకు తీవ్ర గాయం కావడంతో చికిత్స నిమిత్తం ఆస్పత్రికి తరలించారు. మిగిలిన ఇద్దరు పోలింగ్‌ సిబ్బందికి స్వల్ప గాయాలు కావడంతో స్థానికంగానే చికిత్స అందజేశారు. 

నవంబర్ 17వరకు ఎంజాయ్ చేయండి: బెట్టింగ్ యాప్ వివాదం వేళ భాజపాపై బఘేల్‌ విమర్శలు

కాంకర్‌ జిల్లాలోని రేంగాఘాటి రేంగాగొండి పోలింగ్‌ స్టేషన్‌లో విధులు నిర్వహించడానికి కొందరు పోలింగ్‌ సిబ్బంది, పోలీసులను ఎన్నికల అధికారులు ఎంపిక చేశారు. వారంతా మెర్బడా క్యాంప్‌ నుంచి బీఎస్‌ఎఫ్‌ బందోబస్తు సాయంతో బయలుదేరారు. మార్గం మధ్యలో ఉండగానే.. మందుపాతర పేలుడు చోటు చేసుకున్నట్లు తెలిసింది. పోలింగ్‌ తేదీకి ఒక్కరోజు ముందే ఈ ఘటన చోటు చేసుకోవడంతో ఆ ప్రాంతం ఒక్కసారిగా ఉలిక్కిపడింది. 90 అసెంబ్లీ స్థానాలున్న ఛత్తీస్‌గఢ్‌లో రెండు విడతల్లో పోలింగ్ జరగనుంది. నవంబరు 7న తొలి విడత, 17న మలి విడత పోలింగ్‌ నిర్వహించనున్నారు.