Chandrababu: సీఎంకు బాధ్యత ఉండక్కర్లేదా.. రైతుల వద్దకు ఎందుకు రారు?: చంద్రబాబు

ఏలూరు: రాష్ట్రంలో రైతుల బాధలు చూస్తుంటే కడుపు తరుక్కుపోతోందని తెదేపా అధినేత చంద్రబాబు ఆవేదన వ్యక్తం చేశారు. ఏలూరు జిల్లా ఉంగుటూరు మండలం నాచుగుంటలో గురువారం ఆయన పర్యటించారు. అకాల వర్షాల కారణంగా పంట నష్టపోయిన రైతులను పరామర్శించారు. ఈ సందర్భంగా మొలకలు వచ్చిన ధాన్యాన్ని చంద్రబాబుకు చూపిస్తూ.. రైతులు తమ గోడు వెళ్లబోసుకున్నారు. చిరిగిన సంచులు ఇచ్చారు చూడండంటూ వాటిని చూపించారు.

ఈ సందర్భంగా చంద్రబాబు మాట్లాడుతూ.. ‘‘ఈ నాలుగేళ్లలో ఎప్పుడైనా జగన్‌ పొలంలో దిగారా? సీఎంకు బాధ్యత లేదా.. రైతుల వద్దకు ఎందుకు రారు? అన్నదాతలు ఇబ్బందుల్లో ఉంటే ఎయిర్‌పోర్టుకు శంకుస్థాపనా? అది కూడా గతంలో శంకుస్థాపన చేసిన దానికే మళ్లీ చేస్తారా? ధాన్యం సంచులు కూడా ఇవ్వలేని ప్రభుత్వాన్ని ఏమనాలి? రైతులకు న్యాయం జరిగేవరకు అండగా ఉంటా’’ అని చంద్రబాబు భరోసా ఇచ్చారు.