Chandrababu: తెదేపా అభ్యర్థులకు ఈనెల 21న బీఫామ్‌లు ఇవ్వనున్న చంద్రబాబు

అమరావతి: తెలుగుదేశం అభ్యర్థులకు అధినేత చంద్రబాబు ఈనెల 21న బీఫామ్‌లు అందజేయనున్నారు. పార్టీ జోనల్‌ ఇన్‌ఛార్జిలతో నిర్వహించిన సమావేశంలో ఈమేరకు నిర్ణయం తీసుకున్నారు. జోనల్‌ ఇన్‌ఛార్జిల ద్వారా తొలుత బీఫామ్‌లు ఇప్పించాలని భావించినప్పటికీ.. అభ్యర్థులు సెంటిమెంట్‌గా భావిస్తారనే సూచన మేరకు నిర్ణయం మార్చినట్టు సమాచారం. మొత్తం 144 అసెంబ్లీ, 17 పార్లమెంట్ అభ్యర్థులకు తన చేతులమీదుగా బీఫామ్‌లను చంద్రబాబు ఇవ్వనున్నారు.  

అధినేతతో గురువారం జరిగిన సమావేశంలో జోనల్ ఇన్ఛార్జిలు దామచర్ల సత్య, సుజయ్ కృష్ణ రంగారావు, భూమిరెడ్డి రామ్ గోపాల్ రెడ్డి, పెళ్లకూరు శ్రీనివాస్ రెడ్డి, మంతెన సత్యనారాయణ రాజు, బీదా రవిచంద్ర యాదవ్, బొబ్బిలి చిరంజీవి, యనమదల రవి, దీపక్ రెడ్డి, కోవెలమూడి నాని పాల్గొన్నారు. అభ్యర్థుల్ని గెలిపించే బాధ్యత జోనల్ ఇన్ఛార్జిలు తీసుకోవాలని చంద్రబాబు దిశానిర్దేశం చేశారు.