DK Shivakumar: సీఎం మార్పుపై చర్చ.. భాజపాపై డీకేఎస్‌ ఫైర్‌

బెంగళూరు: కర్ణాటక (Karnataka)లో రెండున్నరేళ్ల తర్వాత ముఖ్యమంత్రిని మారుస్తారనే ఊహగానాలను డిప్యూటీ సీఎం డీకే శివకుమార్‌ (DK Shivakumar) తోసిపుచ్చారు. ఈ క్రమంలో ఆయన భాజపాపై విమర్శలు చేశారు. అలాగే, కాంగ్రెస్‌ (Congress) పార్టీ నేతల్లో అసంతృప్తి లేదని స్పష్టం చేశారు. రాష్ట్రంలో భాజపాకు సరైన దిశానిర్దేశం చేసే నాయకులు కరవయ్యారని ఎద్దేవా చేశారు. శుక్రవారం బెంగళూరులో విలేకరులతో మాట్లాడిన ఆయన ఈ వ్యాఖ్యలు చేశారు. 

‘‘మా పార్టీలో కాదు.. భాజపాలోనే అసంతృప్తి ఉంది. అందుకే ఇప్పటికీ అసెంబ్లీలో ఆ పార్టీ ఫ్లోర్‌ లీడర్‌ను ఎన్నుకోలేదు. ఏ రాష్ట్రంలోనైనా ఇలాంటి పరిస్థితి ఉందా? ఎన్నికలు జరిగి ప్రభుత్వం ఏర్పడిన తర్వాత కూడా.. ప్రతిపక్ష పార్టీ తమ నాయకుణ్ని ఎన్నుకోలేదంటే.. ఆ పార్టీ నేతల్లో ఎంత అసంతృప్తి ఉందో అర్థమవుతుంది’’ అని డీకేఎస్‌ విమర్శించారు. 

అరె ఓ సాంబా! ఏం జరుగుతోంది?

గురువారం సీఎం మార్పుపై సిద్ధరామయ్య మాట్లాడుతూ.. ‘‘ఎవరో చేసిన వ్యాఖ్యలకు ఎందుకు ప్రాధాన్యం ఇస్తున్నారు? ఐదేళ్ల పాటు కాంగ్రెస్‌ పార్టీ అధికారంలో ఉంటుంది. నేను సీఎంగా ఉంటాను’’ అని అన్నారు. మరో ముగ్గురు డిప్యూటీ సీఎంలను నియమిస్తారనే వార్తలపై స్పందిస్తూ.. ‘‘అలా అని మీకు ఎవరు చెప్పారు? కాంగ్రెస్‌ జాతీయ పార్టీ. అలాంటి నిర్ణయం ఏదైనా ఉంటే హైకమాండ్‌ చూసుకుంటుంది. అది సీఎం లేదా ఎమ్మెల్యేలు నిర్ణయించే అంశం కాదు’’ అని సిద్ధరామయ్య చెప్పారు. కర్ణాటకలో రెండున్నరేళ్ల తర్వాత సీఎంను మార్చుతారనే చర్చ తీవ్రంగా జరుగుతోంది. దీంతో సీఎం సిద్ధరామయ్య గురువారం చేసిన వ్యాఖ్యలతో స్పష్టత వచ్చింది. ఇప్పుడు ఇదే అంశంపై డీకే కూడా స్పందించారు.