40 ఏళ్లలో ఇలాంటి దాడులు చూడలేదు: యనమల

తొండంగి, న్యూస్‌టుడే: కాకినాడ జిల్లా తొండంగి మండలం శృంగవృక్షం గ్రామంలో అమ్మవారి జాతరలో జరిగిన ఘటనలో మృతి చెందిన దళిత యువకుడు రాము కుటుంబానికి, క్షతగాత్రులకు అండగా ఉంటామని శాసనమండలిలో ప్రతిపక్ష నేత యనమల రామకృష్ణుడు భరోసానిచ్చారు. తొండంగిలో మృతుడి కుటుంబాన్ని, శృంగవృక్షంలో క్షతగాత్రులను గురువారం ఆయన తెదేపా రాష్ట్ర ఆర్గనైజింగ్‌ కార్యదర్శి యనమల కృష్ణుడితో కలిసి పరామర్శించారు. బాధిత కుటుంబాలను ప్రభుత్వం ఆదుకోవాలని యనమల రామకృష్ణుడు డిమాండ్‌ చేశారు. 40 ఏళ్ల నుంచి సోదరభావంతో కలసిమెలసి ఉండే తుని నియోజకవర్గంలో ఇలాంటి దాడులు చోటుచేసుకోవడం బాధాకరమన్నారు. అనంతరం మృతుడు రాము కుటుంబానికి రూ.లక్ష ఆర్థిక సాయం అందించారు. కార్యక్రమంలో తెదేపా నాయకులు కోడ వెంకటరమణ, పేకేటి హరికృష్ణ, చొక్కా అప్పారావు తదితరులు పాల్గొన్నారు.