పొంగులేటి, జూపల్లితో ఈటల భేటీ

భాజపాలో చేరాలని ఆహ్వానం!

ఈనాడు, హైదరాబాద్‌: ఖమ్మం మాజీ ఎంపీ పొంగులేటి శ్రీనివాసరెడ్డి, మాజీ మంత్రి జూపల్లి కృష్ణారావులతో భాజపా రాష్ట్ర చేరికల కమిటీ ఛైర్మన్‌ ఈటల రాజేందర్‌ సమావేశం అయ్యారు. హైదరాబాద్‌ శివారులోని ఓ ఫాంహౌస్‌లో గురువారం ఉదయం జరిగిన ఈ భేటీ 15 నిమిషాలకు పైగా సాగింది. ఈ సందర్భంగా రాష్ట్రంలో తాజా రాజకీయ పరిస్థితులపై నేతలు చర్చించారు. వారిద్దరిని భాజపాలో చేరాలంటూ ఈటల ఆహ్వానించినట్లు సమాచారం. భారాసకు ప్రత్యామ్నాయం భాజపాయేనని స్పష్టం చేసినట్లు తెలిసింది. తమ అభిప్రాయాలు చెప్పిన ఆ ఇద్దరు నేతలు.. కొన్ని ప్రశ్నలు వేసినట్లు తెలుస్తోంది. ఈటల వెళ్లిపోయిన అనంతరం ఆయన చేసిన ప్రతిపాదనలు, చెప్పిన అంశాలపై పొంగులేటి, జూపల్లి చర్చించుకున్నట్లు సమాచారం. సాయంత్రం ఈ ఇద్దరు నేతలు మరోసారి కలుసుకున్నారు. గతంలోనూ ఖమ్మంలో పొంగులేటితో ఈటల చర్చలు జరిపారు. భాజపాలోకి వెళ్లాలా? కాంగ్రెస్‌లో చేరాలా? అన్న అంశంపై పొంగులేటి, జూపల్లి కొంతకాలంగా తర్జనభర్జన పడుతున్నారు. కర్ణాటక అసెంబ్లీ ఎన్నికల ఫలితాల అనంతరం ఈ ఇద్దరు నేతలు తీసుకునే నిర్ణయంపై రాజకీయ వర్గాల్లో ఆసక్తి నెలకొంది. ఈ పరిణామాల నేపథ్యంలోనే ఈటల పొంగులేటి, జూపల్లిలను కలిశారు. సమావేశం సందర్భంగా ఈ ముగ్గురు నేతల వెంట వ్యక్తిగత, భద్రత సిబ్బంది ఎవరూ లేకపోవడం గమనార్హం.