అంబానీ, అదానీల కంటే జగన్‌ ధనికుడు

తెదేపా పొలిట్‌బ్యూరో సభ్యుడు వర్ల

ఈనాడు-అమరావతి: అంబానీలు, అదానీలు, టాటాలను తలదన్నే ధనికుడిగా మారిన ముఖ్యమంత్రి జగన్‌రెడ్డి ఏరకంగా పేదల పక్షమో తెలియజేయాలని తెదేపా పొలిట్‌బ్యూరో సభ్యుడు వర్ల రామయ్య డిమాండ్‌ చేశారు. మంగళవారం ఆయన విలేకరులతో మాట్లాడారు. ‘27 దళిత సంక్షేమ పథకాలు రద్దు చేసినప్పుడే జగన్‌ ధనిక పక్షమని తెలిసిపోయింది. దళితుడైన సుబ్రహ్మణ్యంను హత్య చేసిన అనంతబాబుకు అండగా నిలబడినప్పుడే జగన్‌కు దళితులు దూరమయ్యారు’ అని వర్ల రామయ్య ధ్వజమెత్తారు. ‘ముందస్తు ఎన్నికలకు వైకాపా ఎందుకు భయపడుతోంది? ముందుగా ఎన్నికలకు వెళ్లడం లేదని పెద్దిరెడ్డి చెప్పడం... జగన్‌ భయపడి తోకముడిచినట్లు కాదా? ఎన్నికలపై ఎందుకు పేద, బీద పలుకులు పలుకుతున్నారు? వైకాపా మళ్లీ గెలిచే అవకాశం లేదని గ్రహించే ఒక్క రోజు కూడా అధికారాన్ని వదులుకోమని పెద్దరెడ్డి అంటున్నారు’ అని పేర్కొన్నారు.