‘రైతు ఆత్మహత్యల్లో అగ్రస్థానంలో పులివెందుల’

సొంత నియోజకవర్గానికి ఏం చేశారో రెఫరెండానికి సిద్ధమా?
సీఎంకు తెదేపా ఎమ్మెల్సీ రాంగోపాల్‌రెడ్డి సవాలు

ఈనాడు డిజిటల్‌, అమరావతి: జగన్‌ పాలనలో పులివెందుల నియోజకవర్గంలో వ్యవసాయం అథోగతి పాలైందని, రైతు ఆత్మహత్యల్లో రాష్ట్రంలో అగ్రస్థానంలో ఉందని తెదేపా ఎమ్మెల్సీ భూమిరెడ్డి రాంగోపాల్‌రెడ్డి ధ్వజమెత్తారు. సీఎం ప్రాతినిధ్యం వహిస్తున్న నియోజకవర్గంలో నాలుగు రోడ్ల నిర్మాణాలనూ పూర్తి చేయలేదని ఎద్దేవా చేశారు. పులివెందులకు ఏం చేశారో రెఫరెండానికి సిద్ధమా? అని సీఎం జగన్‌కు మంగళవారం ఓ ప్రకటనలో సవాలు చేశారు. ‘కుప్పానికి చంద్రబాబు ఏమీ చేయనట్టు.. తానేదో అన్నీ చేసేసినట్టు జగన్‌ అబద్ధాలు చెప్పారు. జగన్‌ సీఎం అయ్యాక పులివెందులలో అదనంగా ఒక్క ఎకరానికీ నీళ్లివ్వలేదు. గ్రామీణ సడక్‌ యోజన కింద 2020లో కేంద్ర నిధులతో ప్రారంభమైన రహదారి పనుల్లో పది శాతమూ పూర్తి చేయలేదు. సెంటు పట్టాలిచ్చి 8 వేల ఇళ్లను నిర్మించామనడమేకానీ ఎనిమిది మంది లబ్ధిదారులకైనా ఇచ్చారా? నియోజకవర్గంలో తాగునీటి సమస్య తీవ్రంగా ఉంది. యురేనియం ప్రాజెక్టుతో కలుషిత వ్యర్థాలు భూమిలో కలిసి రైతులు, ప్రజల ఇబ్బందులపై కేంద్రంతోగానీ, యురేనియం కార్పొరేషన్‌ ఆఫ్‌ ఇండియాతో కానీ మాట్లాడారా? పులివెందులలో సూక్ష్మసేద్యం కోసం చంద్రబాబు పరికరాలు అందిస్తే జగన్‌ ఆ ప్రాజెక్టునే అటకెక్కించారు’ అని భూమిరెడ్డి మండిపడ్డారు.

‘నాడు-నేడు’ కింద ఎన్ని పాఠశాలలు బాగు చేశారు?: ‘నాడు-నేడు’ కింద పులివెందుల నియోజకవర్గంలో ఎన్ని పాఠశాలలకు మరమ్మతులు చేశారో చెప్పాలని జగన్‌ను రాంగోపాల్‌రెడ్డి నిలదీశారు.