నాడు హిమాచల్‌ను వద్దనుకున్న కంగన!

దిల్లీ: హిమాచల్‌ ప్రదేశ్‌లోని మండి లోక్‌సభ అభ్యర్థిగా బాలీవుడ్‌ నటి కంగనా రనౌత్‌ను భాజపా ప్రకటించిన వేళ గతంలో ఆమె హిమాచల్‌ నుంచి పోటీకి విముఖత వ్యక్తం చేస్తూ చేసిన ట్వీట్‌ వైరల్‌గా మారింది. రాజకీయాల్లోకి ప్రవేశం గురించి కంగన ప్రస్తావిస్తూ ఎన్నికల్లో పోటీ చేస్తే హిమాచల్‌ ప్రదేశ్‌ నుంచి కాకుండా ప్రత్యర్థులకు గట్టి పోటీ ఇచ్చే మరేదైనా ప్రముఖ నియోజకవర్గం నుంచి బరిలోకి దిగాలని ఉందని చేసిన వ్యాఖ్యలు వైరల్‌గా మారాయి. అయితే ఆమె తన సొంత రాష్ట్రం నుంచి ఎన్నికల్లో పోటీ చేస్తుండంతో సంతోషం వ్యక్తం చేస్తూ ఇన్‌స్టాగ్రామ్‌ వేదికగా స్పందించారు. ‘నా ప్రియమైన భారత దేశ ప్రజల సొంత పార్టీ భాజపాకు ఎల్లప్పుడూ నా మద్దతు ఉంటుంది. నా సొంత రాష్ట్రం హిమాచల్‌ ప్రదేశ్‌లోని మండి నియోజకవర్గ అభ్యర్థిగా భాజపా నా పేరు ప్రకటించింది. ఎన్నికల్లో పోటీ విషయంలో హైకమాండ్‌ నిర్ణయానికి కట్టుబడి ఉన్నా. అధికారికంగా భాజపాలో చేరడం గౌరవంగా భావిస్తున్నా. చాలా సంతోషంగా ఉంది. అందరికీ ధన్యవాదాలు’ అని పేర్కొన్నారు.