వైకాపాకు కాదు.. ప్రజలకు సేవ చేయండి

క్రిమినల్‌ కేసులు నమోదైతే భవిష్యత్తులో ఇబ్బంది
వాలంటీర్లకు అచ్చెన్నాయుడి సూచన

కోటబొమ్మాళి, న్యూస్‌టుడే: ‘వాలంటీర్లు వైకాపాకు, ఆ పార్టీ నేతలకు కాకుండా ప్రజలకు సేవకులుగా పనిచేయాలి. రాజీనామా చేశామని అనుకున్నా క్రిమినల్‌ కేసులు నమోదైతే భవిష్యత్తులో ఇబ్బందులు తలెత్తుతాయి’ అని తెదేపా రాష్ట్ర అధ్యక్షుడు అచ్చెన్నాయుడు వ్యాఖ్యానించారు. శ్రీకాకుళం జిల్లా కోటబొమ్మాళిలోని ఆ పార్టీ కార్యాలయంలో శుక్రవారం తెదేపా ఆవిర్భావ దినోత్సవం సందర్భంగా పతాకాన్ని ఆవిష్కరించి మాట్లాడారు. ‘వాలంటీర్లందరూ చదువుకున్న వారే. ప్రజాధనంతో పనిచేస్తున్నందున ప్రజలకు సేవ చేయాలి. వాలంటీర్లు లేకుంటే గ్రామాలకు వెళ్లలేని పరిస్థితిలో వైకాపా నేతలు ఉన్నారు. కూటమి ప్రభుత్వం ఏర్పడగానే మెరుగైన వ్యవస్థగా తీర్చిద్ది మంచి జీతాలు, ఉపాధి శిక్షణతో ఉత్తమ అవకాశాలు కల్పిస్తాం. ఒకప్పుడు రాష్ట్రంలో తీవ్ర పరిణామాలు, పరిస్థితులు ఉన్నప్పుడు తెదేపా ఆవిర్భవించింది. అప్పటి పరిస్థితిని తలదన్నేలా మారిన రాష్ట్రాన్ని కూటమి ప్రభుత్వంతో రక్షించుకోవలసిన ఆవశ్యకత ప్రజలందరిపైనా ఉంది’ అని అచ్చెన్న ఉద్ఘాటించారు.