ఉద్యోగాలపై ప్రభుత్వానిది అంకెల గారడీ: కాంగ్రెస్‌

దిల్లీ: నిరుద్యోగం విషయంలో కేంద్ర ప్రభుత్వం చెబుతున్నదంతా అంకెల గారడీయేనని కాంగ్రెస్‌ విమర్శించింది. ప్రస్తుతం ఉన్నంత నిరుద్యోగ రేటు గత నాలుగు దశాబ్దాల్లో ఎన్నడూ లేదని ఏఐసీసీ ప్రధాన కార్యదర్శి జైరాం రమేశ్‌ ఎద్దేవా చేశారు. 2020-23 మధ్య సంఘటిత రంగంలో 5.2 కోట్ల ఉద్యోగాలు కొత్తగా లభించినట్లు ఈపీఎఫ్‌వో, ఈఎస్‌ఐ, జాతీయ పింఛన్‌ వ్యవస్థ (ఎన్‌పీఎస్‌) గణాంకాల ఆధారంగా చెప్పడం అర్థరహితమని అన్నారు. మహా అయితే ఆ మూడేళ్ల వ్యవధిలో 2.27 కోట్ల ఉద్యోగాలు వచ్చి ఉంటాయని, ఏడాదికి 2 కోట్ల ఉద్యోగాలు కల్పిస్తామనే వాస్తవ హామీకి ఇది చాలా దూరమని చెప్పారు.