దేశంలోనే భారీ మెజార్టీతో నల్గొండలో గెలుస్తాం

మంత్రి ఉత్తమ్‌కుమార్‌రెడ్డి
కవితకు రెండేళ్లు బెయిల్‌రాదు: కోమటిరెడ్డి

మిర్యాలగూడ, న్యూస్‌టుడే: దేశంలోనే భారీ మెజార్టీతో నల్గొండ ఎంపీ స్థానంలో విజయం సాధిస్తామని పౌరసరఫరాలశాఖ మంత్రి ఉత్తమ్‌కుమార్‌రెడ్డి పేర్కొన్నారు. నల్గొండ జిల్లా మిర్యాలగూడ ఎన్నెస్పీ క్యాంపు మైదానంలో మంగళవారం ఎమ్మెల్యే బత్తుల లక్ష్మారెడ్డి అధ్యక్షతన అభ్యర్థి రఘువీర్‌రెడ్డికి మద్దతుగా ఏర్పాటు చేసిన లోక్‌సభ ఎన్నికల సన్నాహక సమావేశంలో ఆయన మాట్లాడారు. కేంద్రంలో భాజపా అనుసరిస్తున్న విధానాలతో ప్రజాస్వామ్యానికే ప్రమాదం ఏర్పడుతోందన్నారు. దేశంలో ఇండియా కూటమి విజయం సాధించి రాహుల్‌గాంధీ ప్రధాన మంత్రి అవుతారని ధీమా వ్యక్తం చేశారు. ఉద్యమ సమయంలో మోదీ పార్లమెంటులో తెలంగాణను హేళన చేస్తూ మాట్లాడారని పేర్కొన్నారు. ఆర్‌అండ్‌బీ మంత్రి కోమటిరెడ్డి వెంకట్‌రెడ్డి మాట్లాడుతూ.. కేసీఆర్‌లా తాము అబద్ధాలు చెప్పమని, చేసేదే చెబుతామని, వంద రోజుల పాలనలోనే ప్రజలకు పథకాలు అందించామని చెప్పారు. కేసీఆర్‌ బిడ్డ కవితకు రెండేళ్లపాటు బెయిల్‌ రాదని.. కేసీఆర్‌, కేటీఆర్‌ పదేళ్ల దోపిడీని తిరిగి రాబట్టి ప్రజలకు పంచుతామని చెప్పారు. అధికారం కోల్పోయిన తర్వాత వారు సీఎం రేవంత్‌రెడ్డిపై అనుచిత వ్యాఖ్యలు చేస్తున్నారన్నారు. రేవంత్‌ భాజపాలోకి వెళ్తారంటూ ప్రచారం చేయటం తగదని పేర్కొన్నారు.