తంబళ్లపల్లెలో తెదేపా కార్యకర్తలపై లాఠీ ఛార్జ్‌

కూటమి అభ్యర్థి జయచంద్రారెడ్డి నామినేషన్‌ సందర్భంగా ఘటన

ములకలచెరువు గ్రామీణ, న్యూస్‌టుడే: అన్నమయ్య జిల్లా తంబళ్లపల్లె నియోజకవర్గ ఎన్డీయే అభ్యర్థి జయచంద్రారెడ్డి(తెదేపా) నామినేషన్‌ సందర్భంగా తెదేపా కార్యకర్తలపై పోలీసులు లాఠీ ఛార్జ్‌ చేశారు. నియోజకవర్గంలోని తహసీల్దార్‌ కార్యాలయంలో శుక్రవారం నామినేషన్‌ వేసేందుకు వెళ్లిన జయచంద్రారెడ్డిని అనుసరించి కార్యకర్తలు కూడా భారీగా తరలి వెళ్లారు. పోలీసులు వారిని 300 మీటర్ల దూరంలో ఆపారు. ఆ సమయంలో గుర్తు తెలియని వ్యక్తులు రాళ్లు వేయడంతో శిక్షణ డీఎస్పీ ప్రశాంత్‌కు గాయమైంది. దీంతో పోలీసులు తెదేపా శ్రేణులపై లాఠీఛార్జీ చేయడంతో కొందరికి గాయాలయ్యాయి. గురువారం వైకాపా అభ్యర్థి నామినేషన్‌ వేసే సమయంలో ఆ పార్టీ కార్యకర్తలను 100 మీటర్ల దూరం వరకు అనుమతించిన పోలీసులు తమను మాత్రం 300 మీటర్ల దూరంలో నిలువరించడంపై కార్యకర్తలు ఆందోళనకు దిగారు. అధికార పార్టీ నాయకులకు పోలీసులు కొమ్ముకాస్తూ అత్యుత్సాహం చూపుతున్నారని ఆరోపించారు.