రాళ్లదాడి ఘటనలో 47 మందిపై కేసు

నిందితుల్లో ఉప ముఖ్యమంత్రి అంజాద్‌బాషా, తెదేపా నేత శ్రీనివాసరెడ్డి 

కడప నేరవార్తలు, న్యూస్‌టుడే: వైఎస్సార్‌ జిల్లా కడప రెండో పట్టణ పోలీసుస్టేషన్‌ పరిధి గౌస్‌నగర్‌లో ఎన్నికల నేపథ్యంలో ఈ నెల 13న రాత్రి వైకాపా, తెదేపా నేతలు, కార్యకర్తల మధ్య జరిగిన రాళ్లదాడి ఘటనకు సంబంధించి పోలీసులు ఎట్టకేలకు సోమవారం కేసులు నమోదు చేశారు. సీసీ కెమెరాల ఫుటేజీలు, వీడియోలను పరిశీలించి, 47 మందిని గుర్తించారు. అందులో భాగంగా ఉప ముఖ్యమంత్రి అంజాద్‌బాషాతో పాటు వైకాపాకు చెందిన 22 మందిపై, తెదేపా పొలిట్‌బ్యూరో సభ్యుడు శ్రీనివాసరెడ్డితో పాటు ఆ పార్టీకి చెందిన 25 మందిపై పలు సెక్షన్ల కింద కేసులు నమోదు చేసినట్లు సీఐ ఇబ్రహీం తెలిపారు. వారందరికీ 41ఏ నోటీసులు జారీ చేశారు. ఈ ఘటనలో పాల్గొన్నవారిలో చాలామంది పరారీలో ఉన్నారు. దీంతో పోలీసులు వారి నివాసాలకు వెళ్లి నోటీసులు అందజేస్తున్నారు.