లాలూ కుమార్తె రోహిణిపై కేసు నమోదు

పట్నా:  ఆర్జేడీ అధినేత లాలూ ప్రసాద్‌ యాదవ్‌ కుమార్తె రోహిణీ ఆచార్యపై కేసు నమోదైంది. బిహార్‌లోని సారణ్‌ లోక్‌సభ నియోజకవర్గంలో పోలింగ్‌ సందర్భంగా జరిగిన అక్రమాలు, అనంతరం జరిగిన గొడవల్లో ఒక వ్యక్తి మరణించడం తదితర ఘటనలకు సంబంధించి నమోదైన ఎఫ్‌ఐఆర్‌లో ఆమె పేరును చేర్చినట్లు పోలీసులు గురువారం వెల్లడించారు. సారణ్‌లో భాజపా ఎంపీ రాజీవ్‌ ప్రతాప్‌ రూఢీపై మహాగఠ్‌బంధన్‌ తరఫున రోహిణి పోటీ చేస్తున్నారు. ఈ వారం మొదట్లో నియోజకవర్గంలో అల్లర్లు చెలరేగగా పోలీసులు నాలుగు ఎఫ్‌ఐఆర్‌లు నమోదు చేశారు. ఏడుగురు అనుచరులు, 50 మంది గుర్తుతెలియని వ్యక్తులతో వచ్చిన రోహిణి.. ఛప్రా ప్రాంతంలో రెండు పోలింగ్‌ బూత్‌ల్లో అక్రమాలకు పాల్పడ్డారని మనోజ్‌ కుమార్‌ అనే వ్యక్తి ఫిర్యాదు చేశారు. దాని ఆధారంగా ఒక ఎఫ్‌ఐఆర్‌లో పోలీసులు ఆమె పేరును చేర్చారు.