ఎన్నికల్లో దారుణ ప్రదర్శనకు భాజపా డప్పు : జైరాం

దిల్లీ: లోక్‌సభ ఎన్నికలు ప్రధానమంత్రి నరేంద్ర మోదీకి నైతికంగా, రాజకీయంగా, వ్యక్తిగతంగానూ ఓటమితో సమానమని, భాజపా శ్రేణులు ఈ దారుణమైన ప్రదర్శనకు డప్పు కొడుతున్నాయని ఏఐసీసీ ప్రధాన కార్యదర్శి జైరాం రమేశ్‌ విమర్శించారు. కాంగ్రెస్‌కు మాత్రం ఈ ఫలితాలు నైతిక స్థైర్యాన్ని పెంచాయన్నారు. 543 మంది సభ్యులున్న సభకు సగం కన్నా తక్కువగా కేవలం 240 స్థానాలు గెలిచిన భాజపా నిరాశాజనకమైన ఫలితాలను ఆశాజనకంగా చూపించే ప్రయత్నం చేస్తోందని ‘ఎక్స్‌’ ద్వారా ఆయన పోస్ట్‌ చేశారు. వరుసగా మూడుసార్లు మెజారిటీ ప్రభుత్వ ప్రధానమంత్రిగా ప్రమాణస్వీకారం చేసిన నెహ్రూతో మోదీని పోల్చడం కూడా సరికాదన్నారు. పూర్తి ప్రజాస్వామ్యవాదిగా పార్లమెంటుతో చాలా జాగ్రత్తగా నెహ్రూ వ్యవహరించేవారని తెలిపారు. అటల్‌ బిహారీ వాజ్‌పేయీ కూడా మూడుసార్లు ప్రధానిగా ప్రమాణం చేశారని, ఇందిర నాలుగుసార్లు చేశారన్నారు.