మెజారిటీలతో సత్తా చాటారు.. మంత్రి పదవులు చేపట్టారు

- తొలి 10 స్థానాల్లో నిలిచిన నలుగురు ఎంపీలకు చోటు

దిల్లీ: తాజా లోక్‌సభ ఎన్నికల్లో అత్యధిక మెజారిటీతో గెలుపొందిన తొలి 10 మంది ఎంపీల్లో నలుగురు.. కేంద్రంలో నూతన మంత్రివర్గంలో చోటు దక్కించుకోవడం విశేషం. ఆధిక్యం విషయంలో సత్తా చాటిన అమిత్‌ షా, శివరాజ్‌ సింగ్‌ చౌహాన్, జ్యోతిరాదిత్య సింధియా, సీఆర్‌ పాటిల్‌ ఆదివారం కేంద్ర మంత్రులుగా ప్రమాణ స్వీకారం చేశారు. మధ్యప్రదేశ్‌ మాజీ ముఖ్యమంత్రి శివరాజ్‌ సింగ్‌.. విదిశ నుంచి ఎంపీగా గెలిచారు. ఈ దఫా ఆయన 8.21 లక్షల ఆధిక్యంతో ఘన విజయం సాధించారు. క్రితం సారి మోదీ ప్రభుత్వంలో హోం మంత్రిగా కొనసాగిన అమిత్‌ షా ఈ ఎన్నికల్లో గుజరాత్‌లోని గాంధీనగర్‌ నుంచి 7.44 లక్షలకు పైగా ఓట్ల మెజారిటీతో విజయ దుందుభి మోగించారు. గత ప్రభుత్వంలో విమానయాన శాఖ మంత్రిగా పనిచేసిన సింధియా.. మధ్యప్రదేశ్‌లోని గుణ నుంచి 5.40 లక్షల పైచిలుకు ఓట్ల ఆధిక్యం సాధించారు. మరోవైపు సీఆర్‌ పాటిల్‌ గుజరాత్‌లోని నవ్‌సారి నుంచి 7.73 లక్షల మెజారిటీతో గెలుపొందారు.