TDP: ప్రభుత్వ ఖర్చుతో అధికార పార్టీ ఎన్నికల ప్రచారం: గోరంట్ల బుచ్చయ్య

రాజమహేంద్రవరం: సీఎం జగన్‌ను సాగనంపాలని ఏపీ ప్రజలంతా కోరుకుంటున్నారని తెదేపా సీనియర్‌ నేత గోరంట్ల బుచ్చయ్య చౌదరి అన్నారు. రాజమహేంద్రవరంలో నిర్వహించిన మీడియా సమావేశంలో ఆయన మాట్లాడారు. దౌర్భాగ్యపు ప్రభుత్వాన్ని గద్దె దించి ఏపీని రక్షించాలని ప్రజలు భావిస్తున్నారన్నారు. ‘‘దొంగ ఓట్లు చేర్చే కార్యక్రమాన్ని అంతా కలిసి అడ్డుకోవాలి. అధికార దుర్వినియోగానికి పాల్పడే అధికారులను బయటకు పంపాలి. ఎక్కువ కాలం ఒకేచోట ఉన్న అధికారులను వెంటనే బదిలీ చేయడమే కాకుండా అడ్డగోలుగా వ్యవహరిస్తోన్న వారిని ఎన్నికల విధుల నుంచి తొలగించాలి. ఎన్నికల ప్రక్రియలో వాలంటీర్లు పాల్గొనకుండా చూడాలి. ప్రభుత్వ ఖర్చుతో అధికార పార్టీ నేతలు ఎన్నికల ప్రచారం చేసుకుంటున్నారు’’ అని బుచ్చయ్య చౌదరి విమర్శించారు.