Nadendla Manohar: బాధితుల వేదనను ప్రసారం చేయడం తప్పా?: నాదెండ్ల

అమరావతి: బాధితుల వేదన ప్రసారం చేయడం తప్పెలా అవుతుందని జనసేన నేత నాదెండ్ల మనోహర్‌ ప్రశ్నించారు. విశాఖలో బాధితులు చెప్పిందే మీడియా చూపించిందన్నారు. మీడియా ప్రతినిధులను భయపెట్టే చర్యలు సరికాదన్నారు. మీడియాపై పెట్టిన కేసులు పూర్తిగా రాజకీయ ప్రేరేపితమని అర్థమవుతోందన్నారు. ధనలక్ష్మి కుటుంబంపై దాడికి కారకులెవరో పోలీసులే చెప్పాలని డిమాండ్ చేశారు.

విశాఖ కంచరపాలెంలో తమకు ఓటు వేయలేదన్న కారణంతో ఓ కుటుంబంపై వైకాపా శ్రేణులు దాడి చేసిన ఘటన తీవ్ర చర్చనీయాంశమైన విషయం తెలిసిందే. నిందితులపై కఠిన చర్యలు తీసుకోవాల్సిన పోలీసులు.. ఈ ఘటనకు సంబంధించిన వార్తలను ప్రసారం చేసిన సంస్థలపై కేసులు పెట్టడంపై విమర్శలు వెల్లువెత్తుతున్నాయి. దీనిపై ఇప్పటికే తెదేపా నేత అచ్చెన్నాయుడు ఈసీకి ఫిర్యాదు చేశారు. మీడియా సంస్థలపై పెట్టిన కేసులు ఎత్తివేసి, కేసును తప్పుదారి పట్టించిన పోలీసు అధికారులపై చర్యలు తీసుకోవాలని ఆయన కోరిన విషయం తెలిసిందే.