Kanakamedala: పిన్నెల్లిని ఎన్నికల్లో పోటీకి అనర్హుడిగా ప్రకటించాలి: కనకమేడల

అమరావతి: పిన్నెల్లి రామకృష్ణారెడ్డి అరాచకాలు ఒక్కొక్కటిగా ఇప్పుడు వెలుగులోకి వస్తున్నాయని తెదేపా సీనియర్‌ నేత కనకమేడల రవీంద్రకుమార్‌ విమర్శించారు. దీనికి సంబంధించి ఆయన ఓ ప్రకటన విడుదల చేశారు. ‘‘మాచర్ల నియోజకవర్గం సమస్యాత్మక ప్రాంతమైనా సరైన బందోబస్తు ఏర్పాటు చేయలేదు. దేశంలో ఎక్కడా లేని రీతిలో హింస చోటు చేసుకున్నా అరెస్టు లేదు. ఈసీ అరెస్టు చేయాలని ఆదేశించినా పోలీసులు జాప్యం చేశారు. హింసాత్మక చర్యలకు సహకరించి ఎన్నికల ప్రక్రియను అపహాస్యం చేశారు. తెదేపా ఏజెంట్‌ నంబూరిపై హత్యాయత్నం చేసినా కేసు లేదు. కౌంటింగ్‌లో నిష్పక్షపాతంగా వ్యవహరిస్తారా అన్న అనుమానం కలుగుతోంది.

రాష్ట్రంలో పలువురు అధికార దుర్వినియోగానికి పాల్పడి, అధికార వైకాపాకు సహకరించే విధంగా వ్యవహరించారు. ఈ ఎన్నికల్లో ఆంధ్రప్రదేశ్‌లో జరిగినంత అధికార దుర్వినియోగం, అక్రమాలు, హింసాకాండ మరే రాష్ట్రంలో లేదు. పిన్నెల్లిని అరెస్టు చేసి ఎన్నికల్లో పోటీకి అనర్హుడిగా ప్రకటించాలి. కౌంటింగ్‌కు సీఈసీ రాష్ట్రంలో ప్రత్యేక చర్యలు చేపట్టాలి. భద్రతా చర్యలను స్వయంగా ఎన్నికల కమిషనే పర్యవేక్షించాలి’’ అని కనకమేడల డిమాండ్‌ చేశారు.