Kejriwal: ‘తర్వాత అరెస్టు ఆమెదేనని ముందే చెప్పా కదా!’: కేజ్రీవాల్‌ ట్వీట్‌

దిల్లీ: పరువు నష్టం కేసులో ఆప్‌ కీలక నాయకురాలు, దిల్లీ మంత్రి ఆతిశీ (Atishi)కి  దిల్లీ కోర్టు సమన్లు జారీ చేయడంపై సీఎం అరవింద్‌ కేజ్రీవాల్‌ స్పందించారు. ఈమేరకు ట్వీట్‌ చేశారు. ‘‘తర్వాత అరెస్టు అతిశీదేనని ముందే నేను చెప్పాను. ఇప్పుడు ఆ దిశగానే వాళ్లు ప్లాన్‌ చేస్తున్నారు. ఇది పూర్తిగా నియంతృత్వం.  పూర్తిగా నకిలీ, తప్పుడు కేసుల్లో ఆప్‌ నేతలందిరనీ ఒక్కొక్కరిగా అరెస్టు చేస్తున్నారు. మరోసారి నరేంద్రమోదీ అధికారంలోకి వస్తే.. ప్రతిపక్ష నేతలందరినీ ఒకరి తర్వాత ఒకరిని అరెస్టు చేస్తారు. ఆప్‌ ముఖ్యం కాదు.. నియంతృత్వం నుంచి మన ప్రియమైన దేశాన్ని కాపాడుకోవడం ముఖ్యం’’ అని పేర్కొన్నారు.

కేజ్రీవాల్‌ బెయిల్‌ పొడిగింపు అభ్యర్థన.. అత్యవసర విచారణకు సుప్రీం నో

ఆప్‌ ఎమ్మెల్యేల్ని ప్రలోభాలకు గురిచేసి వారికి భారీగా డబ్బు ఎరవేసి కొనేందుకు భాజపా ప్రయత్నించిందంటూ అతిశీ గతంలో ఆరోపించారు. దీనిపై భాజపా మీడియా విభాగం హెడ్‌ ప్రవీణ్ శంకర్ కపూర్‌ ఆమెపై పరువు నష్టం కేసు దాఖలు చేశారు. దీనిపై మంగళవారం విచారణ జరిపిన దిల్లీ కోర్టు ఈ కేసులో జూన్‌ 29న విచారణకు హాజరుకావాలని అతిశీకి ఆదేశాలు జారీ చేసింది. ఈ పరిణామంపై కేజ్రీవాల్‌ పైవిధంగా స్పందించారు.