Nellore: చంద్రబాబు సీఎం అయ్యాక ఫోన్‌ ట్యాపింగ్‌పై విచారణ: కోటంరెడ్డి శ్రీధర్‌రెడ్డి

నెల్లూరు: రూ.కోట్లు ఖర్చుపెట్టి ఇతర పార్టీల నేతలపై సోషల్‌ మీడియా ద్వారా వైకాపా వేధింపులకు పాల్పడుతోందని మాజీ ఎమ్మెల్యే కోటంరెడ్డి శ్రీధర్‌రెడ్డి ఆరోపించారు. నెల్లూరులో నిర్వహించిన మీడియా సమావేశంలో ఆయన మాట్లాడారు. ఏపీసీసీ అధ్యక్షురాలు వైఎస్‌ షర్మిల, వివేకా కుమార్తె సునీతపై సోషల్‌మీడియాలో వ్యక్తిగత విమర్శలు చేస్తున్నారన్నారు. వైకాపా ఎమ్మెల్యే ప్రసన్నకుమార్‌ రెడ్డి ఓటమి భయంతో మాట్లాడుతున్నారని చెప్పారు. తెదేపా అభ్యర్థి వేమిరెడ్డి ప్రశాంతిరెడ్డిని విమర్శిస్తే ఇకముందు తామే సమాధానం చెబుతామన్నారు. ఎంపీ విజయసాయి రెడ్డి రాజ్యసభకు రాజీనామా చేసి లోక్‌సభ స్థానానికి పోటీ చేయాలని డిమాండ్‌ చేశారు. చంద్రబాబు సీఎం అయ్యాక ఫోన్‌ ట్యాపింగ్‌పై విచారణ తప్పదని హెచ్చరించారు. ఈ వ్యవహారాన్ని తాను ఏడాది క్రితమే బయటపెట్టినట్లు కోటంరెడ్డి శ్రీధర్‌రెడ్డి వివరించారు.

ప్రసన్నకుమార్‌రెడ్డి సభ్యత మరచి మాట్లాడుతున్నారని నెల్లూరు డిప్యూటీ మేయర్‌ రూప్‌కుమార్‌ యాదవ్‌ విమర్శించారు. ఓటమి భయంతోనే నోటికొచ్చినట్లు మాట్లాడుతున్నారని తెలిపారు. విజయసాయి రెడ్డి ఓటు నేటికీ విశాఖ సీతమ్మధారలో ఉందని.. అక్కడి నుంచి జగన్‌, విజయసాయిరెడ్డిని తరిమేశారని వివరించారు.