Harish Rao: ఆ రాష్ట్రాల్లో రూ.వెయ్యికి మించి పింఛన్‌ ఇవ్వడం లేదు: హరీశ్‌ రావు

సిద్దిపేట: కాంగ్రెస్‌ ఏ డిక్లరేషన్‌ చేసినా ముందుగా వారు అధికారంలో ఉన్న రాష్ట్రాల్లో చేయాలని మంత్రి హరీశ్‌ రావు దుయ్యబట్టారు. సిద్దిపేటలో బీడీ టేకేదార్లకు నూతన పింఛన్‌ల మంజూరు సహా దివ్యాంగులకు పింఛన్‌ పెంపు, జూనియర్ పంచాయతీ కార్యదర్శులకు ఉద్యోగ క్రమబద్దీకరణ పత్రాలను మంత్రి పంపిణీ చేశారు. ఈ సందర్భంగా ఆయన మాట్లాడారు. 

16 రాష్ట్రాల్లో బీడీ కార్మికులుంటే ఎక్కడా పింఛను ఇవ్వడం లేదని విమర్శించారు. భాజపా, కాంగ్రెస్‌ పాలిత రాష్ట్రాల్లో రూ.వెయ్యికి మించి పింఛన్‌ ఇవ్వడం లేదని విమర్శించారు. కేసీఆర్‌ దివ్యాంగుల ఆత్మగౌరవం పెంచారని తెలిపారు. తెలంగాణలో గృహలక్ష్మి పథకంలో దివ్యాంగులకు 5 శాతం రిజర్వేషన్‌ ఇస్తున్నట్లు వివరించారు. జిల్లాలో 167 మంది జేపీఎస్‌లను క్రమబద్ధీకరిస్తున్నట్లు తెలిపారు. ఇన్ని చేస్తున్న కేసీఆర్‌ను మూడోసారి ముఖ్యమంత్రిగా గెలిపించుకోవాలని మంత్రి హరీశ్‌ రావు కోరారు.