చంద్రబాబుతో పవన్‌, పురందేశ్వరి భేటీ.. ఆ రెండు స్థానాలపై చర్చ!

అమరావతి: తెదేపా అధినేత చంద్రబాబు నివాసంలో ఎన్డీయే కూటమి నేతలు సమావేశమయ్యారు. అమలాపురం నుంచి ఉండవల్లిలోని నివాసానికి చేరుకున్న చంద్రబాబుతో జనసేన అధినేత పవన్‌కల్యాణ్‌, భాజపా రాష్ట్ర అధ్యక్షురాలు పురందేశ్వరి, ఆ పార్టీ రాష్ట్ర ఎన్నికల ఇన్‌ఛార్జ్‌ సిద్ధార్థ్‌నాథ్‌ సింగ్‌ భేటీ అయ్యారు. మరోవైపు తెదేపా జాతీయ ప్రధాన కార్యదర్శి నారాలోకేశ్‌ కోయంబత్తూరు పర్యటన ముగించుకుని అమరావతి చేరుకున్నారు. ఆయన కూడా ఈ సమావేశంలో పాల్గొన్నారు. 

ప్రస్తుత ప్రచారశైలి, భవిష్యత్తు కార్యాచరణ, క్షేత్రస్థాయి పరిస్థితులపై నేతలు చర్చిస్తున్నట్లు తెలుస్తోంది. దీంతోపాటు అనపర్తి, ఉండి తదితర స్థానాలపై చర్చ జరుగుతున్నట్లు సమాచారం. పరస్పర మార్పు కోరుకుంటున్న వివిధ స్థానాలపైనా కూటమి నేతల మధ్య సమాలోచనలు జరిగే అవకాశముంది.