Purandeswari: ఆ ఫ్లెక్సీలో తప్పే లేదు.. అందుకే రూ.లక్ష బహుమతి: పురందేశ్వరి

అమరావతి: యువ‌ మోర్చా నేతపై సీఐ దాడి చేశారని భాజపా రాష్ట్ర అధ్యక్షురాలు దగ్గుబాటి పురందేశ్వరి మండిపడ్డారు. దాడిని తీవ్రంగా ఖండిస్తున్నట్లు చెప్పారు. ఎయిమ్స్‌ ఆస్పత్రి ప్రారంభోత్సవం సందర్భంగా యువ మోర్చా ఫ్లెక్సీ పెట్టడంలో తప్పు లేదన్నారు. ఓట్లతో నిమిత్తం లేకుండా రాష్ట్రానికి కేంద్ర ప్రభుత్వం సహకరిస్తుందని, అందులో భాగంగానే ఎయిమ్స్ నిర్మాణానికి ప్రతి రూపాయీ కేంద్రమే ఇచ్చిందని వివరించారు. ఇది తప్పని నిరూపిస్తే రూ.లక్ష బహుమతి ఇస్తామని యువమోర్చా ఫ్లెక్సీ ఏర్పాటు చేసిందని చెప్పారు. ఉన్నతాధికారులు సీఐపై చర్యలు తీసుకోవాలని డిమాండ్‌ చేశారు. ఎయిమ్స్ నిర్మాణంలో ఎన్నో ఇబ్బందులు ఎదురయ్యాయని, వైకాపా సర్కారు సక్రమంగా నీరు కూడా ఇవ్వలేదని ఆరోపించారు. పక్కనే డంపింగ్‌ యార్డు పెట్టడంతో దుర్గంధం వస్తోందన్నారు.