NCP: ‘ఎన్నికల ప్రచారంలో ఆయన పేరు, ఫొటో వాడకండి’

దిల్లీ: ఎన్సీపీ ఎన్నికల ప్రచారంలో శరద్‌ పవార్‌ (Sharad Pawar) పేరు, ఫొటో ఉపయోగించవద్దని అజిత్ పవార్‌ (Ajit Pawar) వర్గానికి సుప్రీంకోర్టు (Supreme Court) సూచించింది. ఇందుకు హామీ ఇవ్వాలని కోరింది. లేనిపక్షంలో అజిత్ వర్గానికి వ్యతిరేకంగా ఆదేశాలు ఇస్తామని హెచ్చరించింది. రాబోయే ఎన్నికల్లో తన పేరు, ఫొటోను అజిత్ వర్గం ఉపయోగించకుండా ఆదేశాలివ్వాలని శరద్‌ పవార్‌ దాఖలు చేసిన పిటిషన్‌పై గురువారం సుప్రీం ధర్మాసనం విచారణ జరిపింది. 

‘‘మీకున్న ప్రజాదరణపై నమ్మకం ఉన్నప్పుడు మీ ఫొటోనే ఉపయోగించండి. ఇకపై శరద్ పవార్‌ ఫొటో ఉపయోగించొద్దని మీ కార్యకర్తలకు చెప్పండి. మీరు ఆ పని చేయలేకపోతే.. మేం ఆదేశాలు ఇస్తాం’’అని జస్టిస్‌ సూర్యకాంత్‌, జస్టిస్‌ కేవీ విశ్వనాథన్‌లతో కూడిన సుప్రీం ధర్మాసనం వ్యాఖ్యానించింది. దీనిపై మార్చి 19లోగా స్పందన తెలియజేయాలని అజిత్‌ పవార్‌ వర్గాన్ని ఆదేశించింది. కోర్టు ఆదేశాల నేపథ్యంలో ఎన్నికల ప్రచారంలో యశ్వంతరావ్‌ చౌహాన్‌ పేరు, ఫొటోలు ఉపయోగించాలని నిర్ణయించినట్లు ఆయన తెలిపారు.

‘మా దగ్గర డబ్బు లేదు’: లోక్‌సభ ఎన్నికల వేళ ఖర్గే వ్యాఖ్యలు

అజిత్‌ పవార్‌ గతేడాది ఎన్సీపీ నుంచి చీలి భాజపా- శిందే సారథ్యంలోని ప్రభుత్వంలో చేరడంతో పార్టీలో సంక్షోభం తలెత్తింది. దీంతో పార్టీ ఎవరిదనే విషయంలో ఇరు వర్గాల మధ్య నెలకొన్న వివాదాన్ని కేంద్ర ఎన్నికల సంఘం ఇటీవల పరిష్కరించింది. అజిత్‌ పవార్‌ నేతృత్వంలోని వర్గాన్నే అసలైన ఎన్సీపీగా గుర్తించి.. ఆ పార్టీ జెండా, ఎన్నికల గుర్తును కూడా వారికే కేటాయించింది. ఎన్సీపీకి 53 మంది ఎమ్మెల్యేలు ఉండగా.. అజిత్‌ వర్గం చీలిక తర్వాత శరద్‌ పవార్‌ పార్టీపై క్రమంగా నియంత్రణ కోల్పోతూ వచ్చారు. ప్రస్తుతం ఆయన వెంట 12 మంది ఎమ్మెల్యేలే ఉన్నట్లు సమాచారం.