TDP: తెదేపాకు తొలి విజయం.. గోరంట్ల బుచ్చయ్య చౌదరి గెలుపు

అమరావతి: ఏపీ ఎన్నికల ఫలితాల్లో తెదేపాకు తొలి విజయం ఖరారైంది. రాజమహేంద్రవరం రూరల్‌ స్థానం నుంచి ఆ పార్టీ అభ్యర్థి గోరంట్ల బుచ్చయ్య చౌదరి గెలుపొందారు. సమీప ప్రత్యర్థి, వైకాపా అభ్యర్థి చెల్లుబోయిన వేణుగోపాలకృష్ణపై ఆయన భారీ విజయం సాధించారు. బుచ్చయ్య చౌదరికి 64,090 ఓట్ల వేల మెజార్టీతో గెలిచారు. ఆయనకు మొత్తం 1,29,060 ఓట్లు రాగా.. ప్రత్యర్థికి 64,970 ఓట్లు వచ్చాయి.

మరోవైపు రాష్ట్రంలోని అత్యధిక స్థానాల్లో తెదేపా అభ్యర్థుల ఆధిక్యంలో కొనసాగుతున్నారు. పెదకూరపాడులో భాష్యం ప్రవీణ్‌, రాప్తాడులో పరిటాల సునీత, ఉరవకొండలో పయ్యావుల కేశవ్‌, సంతనూతలపాడులో విజయ్‌కుమార్‌, విజయవాడ సెంట్రల్‌లో బొండా ఉమా తదితరులు లీడ్‌లో ఉన్నారు. 

తెదేపా కార్యాలయం వద్ద సంబరాలు

రాష్ట్రంలో కూటమి ప్రభంజనంతో అమరావతిలోని తెదేపా కేంద్ర కార్యాలయం వద్ద సంబరాలు జరుగుతున్నాయి. పెద్ద ఎత్తున నేతలు, కార్యకర్తలు అక్కడికి చేరుకున్నారు. జై చంద్రబాబు, జై లోకేశ్‌ నినాదాలతో సందడి చేశారు. మరోవైపు హైదరాబాద్‌లోని బంజారాహిల్స్‌లో తెదేపా కార్యాలయం వద్దకు పెద్ద ఎత్తున యువత, మహిళలు చేరుకుని సంబరాలు చేసుకున్నారు. పరస్పరం మిఠాయిలు పంచుకుని శుభాకాంక్షలు చెప్పుకొన్నారు.