ఈ రాయి డ్రామాకు ఎవరిని బలి చేస్తారో: మాజీ మంత్రి నక్కా ఆనందబాబు

గుంటూరు: సీఎం జగన్‌ది మరో కోడికత్తి డ్రామా అని తెదేపా సీనియర్‌ నేత, మాజీ మంత్రి నక్కా ఆనందబాబు ధ్వజమెత్తారు. కొత్త నాటకానికి ఆయన తెరలేపారని విమర్శించారు. విజయవాడలో సీఎం జగన్‌పైకి గుర్తు తెలియని వ్యక్తి రాయి విసరడంతో ఆయన నుదుటిపై గాయమైన సంగతి తెలిసిందే. ఈ నేపథ్యంలో గుంటూరులో ఆనందబాబు మీడియా సమావేశం నిర్వహించారు. గత ఎన్నికలకు ముందు ఆడిన కోడికత్తి నాటకం ఫలితంగా అమాయక దళిత యువకుడు ఐదేళ్లు జైలులో ఉన్నాడన్నారు. ఇప్పుడు ఈ రాయి డ్రామాకు ఏ దళితుడిని బలి చేస్తారోనని వ్యాఖ్యానించారు. ఐ ప్యాక్‌ డైరెక్షన్‌లో ఇంకా ఎన్ని డ్రామాలు చూడాలోనని ఆయన ఎద్దేవా చేశారు.

రాష్ట్రానికి రక్షణ కల్పించాల్సిన సీఎంకే భద్రత లేదంటే అది జగన్ చేతకానితనమన్నారు. ఇది ముమ్మాటికీ ఐ ప్యాక్ ఆధ్వర్యంలో పథకం ప్రకారం జరిగిన దాడిగా ఆయన అభివర్ణించారు. గత ఎన్నికల సమయంలో బాబాయ్‌ని చంపించి చంద్రబాబు మీద దుష్ప్రచారం చేసి లబ్ధి పొందారని ఆగ్రహం వ్యక్తం చేశారు. వివేకా రక్తపు పునాదుల మీద జగన్ ప్రభుత్వం ఏర్పడిందని సొంత చెల్లెళ్లే చెబుతున్నారన్నారు. ఈ ఘటనతో తమకు సంబంధమేంటని నిలదీశారు. ఎన్నికల్లో లబ్ధికి వైకాపా ఆడుతున్న నాటకాలను ప్రజలంతా గమనిస్తున్నారన్నారు.